ԵՐԵՎԱՆ, 29 մայիսի — Sputnik. ԵՊՀ ռեկտոր Արամ Սիմոնյանը մտադիր չէ երկար զբաղեցնել իր պաշտոնը։ Այդ մասին նա հայտարարեց երեքշաբթի ուսանողների հետ հանդիպումից հետո, որոնք առավոտից դասադուլ էին հայտարարել` պահանջելով բուհի ռեկտորի հրաժարականը։
«Ես իմ թեկնածությունը չորրորդ անգամ առաջադրելու իրավունք ունեմ, բայց ես դա չեմ անի, ինձ պետք չէ», — լրագրողներին ասաց Սիմոնյանը արդեն ուսանողների հետ ոչ արդյունավետ երկխոսությունից հետո։
Հիշեցնենք, որ ԵՊՀ ուսանողները վաղ առավոտից դասադուլ էին կազմակերպել մայր բուհի շենքի դիմաց։ Ակցիայի մասնակիցները պնդում էին, որ համալսարանում մի շարք խնդիրներ են կուտակվել`կրթության ցածր որակ, ակադեմիական ազատության բացակայություն, ռեսուրսների ոչ նպատակային ծախս։
Արամ Սիմոնյանը հանդիպեց ուսանողների հետ ԵՊՀ գիտխորհրդի նիստերի դահլիճում, սակայն կողմերն այդպես էլ չհանգեցին փոխզիջման։ Հանդիպումն ավարտվեց նրանով, որ Սիմոնյանը հայտարարեց` ցուցարարները պատրաստ չեն կառուցողական երկխոսության։
«Դա բացահայտ ճնշում է։ Դուք պատրաստ չեք կառուցողական երկխոսության», — ասաց Սիմոնյանը և փորձեց դուրս գալ դահլիճից, բայց ցուցարարները չթողեցին, որ նա մտնի իր աշխատասենյակ։
Ռեկտորը խնդրեց մուտքի մոտ նստած ուսանողներին ազատել տարածքը։ Ուսանողները ոչ միանգամից, բայց ամեն դեպքում հանձնվեցին` նախազգուշացնելով, որ դրանով ամեն ինչ չի վերջանա։
«Հաշվի առնելով ձեր տարիքը և այն, որ մենք մի ազգ ենք` մենք կազատենք ճանապարհը ձեզ համար, բայց սպասում ենք ձեր մեկնաբանություններին», — հայտարարեց ակտիվիստներից մեկը։
Սիմոնյանը մեղադրեց ուսանողներին բռնություն կիրառելու համար` անթույլատրելի համարելով նրանց պահվածքը, ինչպես նաև հայտարարեց, որ զիջումների չի գնա։
«Սա ժողովրդավարություն չէ, այլ հաշվեհարդար քաղաքական համոզմունքների համար (Սիմոնյանը ՀՀԿ անդամ է` խմբ.)։ Ես զիջումների և պատասխան բռնության չեմ գնա։ Ես ինչ-որ բան կարող եմ անել ինքնակամ, բայց ոչ այսպես», — ասաց Սիմոնյանը։
Բուհի ղեկավարն ասաց լրագրողներին, որ ոչ ոք չի խոսում այն մասին, թե որքան բան է արվել համալսարանի համար իր աշխատանքի տարիներին` ընդգծելով, որ անձամբ հիանալի գիտակցում է բոլոր խնդիրները։
Սիմոնյանը խոստովանեց, որ բուհը խնդիրներ ունի` ինչպես օբյեկտիվ, այնպես էլ սուբյեկտիվ, բայց նշեց, որ դրանք չեն կարող լուծվել բռնի ճանապարհով։
Ավելի վաղ «ԵՊՀ Ռեստարտ» և «Տոտալ ռեստարտ» նախաձեռնությունները հայտարարություններ են տարածել և բուհի դասախոսներին հորդորել են միանալ ուսանողներին և գործադուլ անել։
Նախաձեռնողները հայտարարել են, որ պահանջելու են ԵՊՀ ռեկտորի հրաժարականը, բուհի խորհրդի լուծարումը, ուսխորհրդի գործունեության դադարեցումը և ֆինանսական աուդիտի անցկացում։
Սիմոնյանը ԵՊՀ ռեկտորի պաշտոնը զբաղեցնում է 2006թ-ից։
