ԵՐԵՎԱՆ, 28 մայիսի — Sputnik. Հայ ժողովուրդն այդ պետականությունը կարողացել է պահել, պահպանել և պաշտպանել առանց պետականության, առանց Ազգային ժողովի, առանց նախագահի, առանց վարչապետի՝ ունենալով իր հավատը Աստծո, իր եկեղեցու, իր մշակույթի ու ոգու, կրթության ու զավակների ապագայի նկատմամբ. այսօր Սարդարապատի հուշահամալիրում լրագրողների հետ զրույցում ասաց ՀՀ նախագահ Արմեն Սարգսյանը:
«Մենք նաև հաղթանակած ժողովուրդ ենք Արցախում ու Սարդարապատում, պարտավոր ենք ոչ միայն պահել, պաշտպանել, այլ նաև ամրապնդել, դարձնել մեր հայրենիքը՝ Հայաստանն ու Արցախը փոքր, բայց հզոր երկիր»,-ասաց Արմեն Սարգսյանը:
ՀՀ նախագահի համոզմամբ` եթե չլիներ Առաջին Հանրապետությունը, չէր լինի նաև երկրորդը՝ խորհրդային Հայաստանը, իսկ եթե չլիներ խորհրդային Հայաստանը, որը 70 տարիների ընթացքում կարողացավ ստեղծել մշակույթ, կրթություն, մասնակցել Երկրորդ համաշխարհային պատերազմին, կազմակերպել ներգաղթ, ապա շատ դժվար կլիներ ստեղծել նաև երրորդ` Հայաստանի անկախ Հանրապետությունը:
