ԵՐԵՎԱՆ, 25 մայիսի — Sputnik. Ռուսաստանում Հայաստանի դեսպանատունը հայտարարություն է տարածել` պատասխանելով դեսպանատան տարածքում իրականացվող շինարարության հարցը պարզաբանելու բազմաթիվ խնդրանքներին։
««Արխնաձոր» հասարակական շարժման ֆեյսբուքյան հրապարակման հետ կապված հայտնում ենք, որ Ռուսաստանում Հայաստանի դեսպանատան տարածքում` «Լազարյանների տան ծառայողական մասնաշենքում», Մոսկվայի Մշակութային ժառանգության դեպարտամենտի տրամադրած թույլտվության համաձայն` գիտահետազոտական աշխատանքներ են իրականացվում», — նշվում է հայտարարությունում, որը հրապարակվել է դեսպանատան ֆեյսբուքյան էջում։
Հաղորդագրության համաձայն ` աշխատանքներն իրականացվում են կառույցի պատմական տեսքը վերականգնելու համար։
Ըստ հայտարարության` բուն դեսպանատանն աշխատանքներ իրականացնելուց բացի, Մոսկվայի կառավարության «Իմ փողոցը» բարեկարգման ծրագրի համաձայն` Կրիվոկոլեննի ու Հայկական նրբանցքներում վերանորոգման աշխատանքներ են իրականացնում մայթի հակառակ կողմում ու ճանապարհի երթևեկելի հատվածում, որի հետևանքով հետիոտները ստիպված են Ծառայողական կողաշենքին կից մայթով անցնել։
Մասնավորապես`հետիոտների անվտանգությունն ապահովելու համար վթարային շենքի պատերին ցուցանակներ են փակցվել։ Աշխատանքները գիշերն են անցկացնում, որպեսզի հետիոտների ճանապարհը չփակեն, ու նրանք ստիպված չլինեն ճանապարհի երթևեկելի մասով անցնել։
Նշենք, որ Ռուսաստանում Հայաստանի դեսպանատան շենքը հայտնվել է Մոսկվայում զբոսանքների համար արտասովոր վայրերի լավագույն տասնյակում։
Հայկական նրբանցքի անվանումը պատահական չէ. այս տարածքի տները 18-րդ դարից ի վեր պատկանում էին հարուստ վաճառական Լազար Նազարի Լազարյանին, որին 1774 թ. մայիսին կայսրուհի Եկատերինա II-ը ժառանգական ազնվականություն է տվել:
