ԵՐԵՎԱՆ, 25 մայիսի — Sputnik. Հայաստանի կրթության և գիտության նախարար Արայիկ Հարությունյանը կոչ է արել շրջանավարտներին ավելի զգոն լինել, ոչ սթափ վիճակում և առանց վարորդական իրավունքի չնստել ղեկի դիմաց։ Այդ մասին նա ասել է ֆեյսբուքյան իր էջում` ուղիղ միացումով դիմելով դպրոցականներին, որոնց համար այսօր Հայաստանի դպրոցներում հնչել է վերջին զանգը։
«Հայաստանում կարծես կապն ավելի լավ է, քան Փարիզում։ Այստեղ մասնակցում եմ Բոլոնյան գործընթացի անդամ երկրների նախարարական գագաթնաժողովին։ Այստեղ շատ կարևոր հարցեր են որոշվում, որոնց կառնչվեն աշակերտներն ապագայում բուհերում սովորելիս», — ասել է Հարությունյանը։
Նա կոչ է արել ծնողներին և շրջանավարտներին շատ զգույշ լինել, ինչպես նաև հաղորդել, որ արդեն գիտի առավոտյան միջադեպի մասին։
Մայիսի 25-ին, ժամը 08։00-ի սահմաններում Nissan Teana մակնիշի ավտոմեքենայի վարորդը Նոր Նորք վարչական շրջանի 4-րդ զանգվածից դեպի 5-րդ զանգված տանող ճանապարհահատվածում դուրս է եկել հանդիպակաց երթևեկելի գոտի, բախվել կամրջի բետոնե հատվածին և գլխիվայր շրջվելով՝ մասամբ հայտնվել ճանապարհի մեջտեղում։ Դպրոցականները հոսպիտալացվել են։
«Եկեք այնպես անենք, որ այդ ուրախ օրը չմռայլվի։ Եվս մի անգամ կոչ եմ անում մեքենան չվարել առանց վարորդական իրավունքի և ոչ սթափ վիճակում», — ասել է Հարությունյանը և հավելել, որ մայիսի 26-ին կվերադառնա Հայաստան։
Ավելի վաղ ճանապարհային ոստիկանության ծառայողները նախազգուշացրել են «Վերջին զանգի» օրը ավտոմեքենաները չվստահել անչափահասներին և ղեկի դիմաց նստել միայն սթափ վիճակում։
