Ստեփանակերտը պետք է ավելի ակտիվ մասնակցի արցախյան բանակցային գործընթացին։ Այս մասին այսօր ճեպազրույցի ժամանակ ասաց ՀՀ ԱԳՆ մամուլի քարտուղար Տիգրան Բալայանը։
Ավելի վաղ ՀՀ վարչապետ Նիկոլ Փաշինյանը հայտարարել է, որ արտաքին քաղաքականության հարցում հասարակական կոնսենսուս կա։
«Հայաստանի դիրքորոշումը` Ղարաբաղյան հիմնախնդրի կարգավորման գործընթացի վերաբերյալ, փոփոխություն չի կրել։ Այն, որ մենք պնդում ենք` Արցախը պետք է մասնակցի բանակցություններին, նորություն չէ. ԱԳՆ-ն նախկինում էլ էր խոսում դրա մասին», — ընդգծեց Բալայանը։
Նրա խոսքով` հիմա իրավիճակը փոխվել է, ու Արցախի մասնակցությունը բանակցություններին պետք է ավելի զգալի լինի։
«Այսօր մեր նպատակն է, որ Ադրբեջանի իշխանությունները հստակ հասկանան` կարգավորմանը հասնելու համար պետք է Արցախի հետ բանակցությունների սեղան նստել։ Մենք` որպես Արցախի երաշխավոր, շարունակում ենք բանակցությունները, մենք դրանցից չենք հրաժարվում, երբ խոսում ենք այն մասին, որ հաստատուն խաղաղության ու հակամարտության կարգավորման համար Ղարաբաղի մասնակցությունն է անհրաժեշտ», — ասաց Բալայանը։
Նրա խոսքով` Արցախն այսպես թե այնպես ներառված էր բանակցային գործընթացում։ Դա հաստատող փաստաթղթեր կան։ Միաժամանակ Ադրբեջանը մերժում է ուղիղ բանակցությունները։
ԱԳՆ մամուլի քարտուղարը հիշեցրեց, որ 1994 թվականի հրադադարը կնքվել է Արցախի ու Ադրբեջանի միջև։
Նրա խոսքով` հարցը պետք է խաղաղ հունով լուծվի, ԵԱՀԿ Մինսկի խմբի շրջանակում։ Իսկ ապրիլյան պատերազմից հետո` նաև Վիեննայում ու Պետերբուրգում ձեռք բերված պայմանավորվածությունների հիման վրա։
Բալայանը հայտնեց, որ համանախագահները Երևան են գալու հունիսին։ Հիմա կոնկրետ ժամկետներն են քննարկվում։
Ինչ վերաբերում է Հայաստանի ու Ադրբեջանի արտգործնախարարների հանդիպմանը, այս պահին այդպիսի պայմանավորվածություններ չկան։
