ԵՐԵՎԱՆ, 11 մայիսի — Sputnik. Հայաստանի նոր վարչապետի հայտարարությունն այն մասին, որ Արցախը պետք է բանակցությունների սեղանի մոտ վերադառնա, շատ ժամանակին էր։ Այս մասին այսօր լրագրողներին ասաց «Նորավանք» հիմնադրամի Քաղաքական հետազոտությունների կենտրոնի ղեկավար Կարեն Վերանյանը։
Նրա խոսքով` կարևոր էր, որ նոր վարչապետն այդ հարցին անդրադարձավ իր նշանակման հաջորդ օրը Ստեփանակերտում։
«Բնականաբար, Ստեփանակերտի մասնակցությունը կհանգեցի նրան, որ բանակցային գործընթացը լիարժեք կդառնա։ Դա կարող է փոխել բանակցությունների ընդհանուր դինամիկան», — ասաց Վերանյանը։
Ըստ նրա` այլ հարց է` որքանով է հիմա հնարավոր վերականգնել Արցախի մասնակցությունը բանակցություններին։ Այսօրվա ձևաչափը ձեռնտու է ԵԱՀԿ Մինսկի խմբին ու Ադրբեջանին, այդ պատճառով էլ այդ հարցը դժվար թե շատ արագ լուծվի։ Թեև դա հնարավոր է անել պաշտպանության ու անվտանգության ներուժի եռապատկման կամ քառապատկման դեպքում, նաև մարդկային կապիտալի հաշվին։
«Ժամանակի առումով որքան ավելի շուտ բարձրացվի Արցախի մասնակցության հարցը, այնքան ավելի լավ։ Հակամարտության անմիջական կողմը չի կարող չմասնակցել բանակցություններին», — ասաց Վերանյանը։
Նրա խոսքով` առանց Ստեփանակերտի ընդհանրապես հնարավոր չէ լուծել այդ հակամարտությունը։
Նա նաև նշեց, որ շփման գծում շարունակվում է տեխնիկա կուտակվել, և այդ փաստը չի կարելի անտեսել։ Միաժամանակ, Վերանյանի խոսքով, հիմա ռազմական գործողությունների վերականգման հավանականությունն այդքան էլ մեծ չէ։
