ԵՐԵՎԱՆ, 19 մայիսի –Sputnik, Դավիթ Գալստյան. ԱՄՆ-ի և Իրանի միջև հարաբերությունների սրացումը կարող է հանգեցնել Ռեշտ-Աստարա հատվածի շինարարության սառեցմանը, Sputnik Արմենիային ասաց արևելագետ Արտյոմ Տոնոյանը։
Տոնոյանի խոսքով` Իրանի շուրջ ստեղծված լարված իրավիճակը, մասնավորապես, ԱՄՆ–ի դուրս գալը միջուկային գործարքից, կարող է բերել Բաքվի և Թեհրանի միջև հարաբերությունների սրացման։
«Մի կողմից դա կապված է ամերիկաադրբեջանական հարաբերությունների հետ, մյուս կողմից` Ադրբեջանի և Իսրայելի մտերիմ կապերի։ Ժամանակին, նաև իրանական ԶԼՄ-ներում հաղորդագրություն էր տարածվել, որ Ադրբեջանն իսրայելական հատուկ ծառայությունների «հետին բակն» է», – ասաց Տոնոյանը։
Բացի այդ, այժմ Ադրբեջանում խոսակցություններ են գնում այն մասին, որ ստեղծված իրավիճակում հարցականի տակ է դրվում Հյուսիս-հարավ երկաթգծի Ռեշտ-Աստարա հատվածի շինարարության ավարտը։
Իրանագետի խոսքով` փորձագետները մտավախություն ունեն, որ հավանական պատժամիջոցները կարող են անհնարին դարձնել Իրանին` շինարարության համար խոստացած 500 մլն դոլար վարկի փոխանցումը։
Հետևաբար, գումարի բացակայությունը կարգելակի Իրանն ու Ադրբեջանը միացնող երկաթգծի կառուցումը։
Հիշեցնենք, որ 2017 թվականի նոյեմբերին «Ադրբեջանի երկաթուղիներ» ընկերության ղեկավար Ջավիդ Գուրբանովը հայտարարել էր, որ ադրբեջանական կողմը Ռեշտ-Աստարա հատվածի շինարարության համար արդեն իսկ 500 մլն դոլարի վարկ է տրամադրել Իրանին, և երկու երկրները նախաստորագրել են վարկային համաձայնագիրը:
Սակայն այդ տեղեկությունը չի հաստատվել։ Փորձագետի կարծիքով` վարկի հատկացման հետ կապված հարցերն Իրանի և Ադրբեջանի առաջնորդների օրակարգում էր 2018 թվականի մարտի վերջին Բաքվում կայացած հանդիպման ժամանակ։
Նշենք, որ Ռեշտ-Աստարա երկաթգծի կառուցումը 1,1 մլրդ դոլար է գնահատվում:
