ԵՐԵՎԱՆ, 30 մարտի — Sputnik. Իրանի նախագահ Հասան Ռուհանիի` Բաքու կատարած այցը կարող է կապված լինել 500 միլիոն դոլար վարկի պայմանների քննարկման հետ։ Այս մասին Sputnik Արմենիային ասաց արևելագետ Արտյոմ Տոնոյանը։
Ադրբեջանցի որոշ փորձագետներ նույնպես այդ գործոնն են մատնանշում. ադրբեջանական վարկը պետք է տրամադրվեր Իրանին Ռեշտ-Աստարա երկաթուղու շինարարության համար։
«Բանն այն է, որ Աստարայի (Իրան) ու Աստարայի (Ադրբեջան) միջև կամուրջը հիմա երկու երկրներին ոչինչ չի տալիս, քանի որ իրանական ճանապարհի մի մասն անավարտ է», —ասաց Տոնոյանը։
Արևելագետը նշեց, որ քննարկվում են նաև երկկողմ հարաբերությունների այլ ասպեկտներ. տարբեր ոլորտներում տարատեսակ փաստաթղթեր են կնքվում, սակայն, ըստ էության, այս ամենը կարելի է արարողակարգային միջոցառումներ համարել։
Այցի իսկական նպատակը հենց վարկի մանրամասները քննարկելն է։
Ավելի վաղ «Ադրբեջանի երկաթուղիներ» ընկերության ղեկավար Ջավիդ Գուրբանովը հայտարարել էր, որ ադրբեջանական կողմն արդեն 500 մլն դոլարի վարկ է տրամադրել Իրանին, և երկու երկրները նախաստորագրել են վարկային համաձայնագիրը:
Ռեշտ-Աստարա երկաթգծի կառուցումը 1,1 մլրդ դոլար է գնահատվում:
