ԵՐԵՎԱՆ, 18 մայիսի — Sputnik. Գլխավոր դատախազության շենքի մոտ հավաքված տասնյակ մարդիկ շարժվեցին ՀՀ վճռաբեկ դատարանի ուղղությամբ։ «Հայաստանն առանց քաղբանտարկյալների» ակցիայի մասնակիցները պահանջում են ազատ արձակել Արցախի պաշտպանության բանակի նախկին գլխավոր հրամանատար Սամվել Բաբայանին, ինչպես նաև պահանջում են ՀՀ գլխավոր դատախազ Արթուր Դավթյանի հրաժարականը, դեպքի վայրից հայտնում է Sputnik Արմենիայի թղթակիցը։
Բաբայանին ձերբակալել էին 2017 թվականի մարտին Վրաստանից Հայաստան «Իգլա» դյուրակիր զենիթահրթիռային համալիր ներմուծելու փաստով հարուցած քրեական գործի շրջանակում։
Հունիսին հետաքննությունը պարզել էր, որ Բաբայանը մաքսանենգության հետ առնչություն չունի, բայց նրան վերագրեցին զենք-զինամթերքի, պայթուցիկ նյութերի կամ սարքերի ապօրինի ձեռք բերման, իրացման, տեղափոխման և պահման հանցանք, ինչպես նաև փողերի լվացում։
«Քանի որ վճռաբեկ դատարանը Բաբայանի գործը վարույթ չի ընդունում, պահանջում ենք, ելնելով Հայաստանի քաղաքական իրավիճակից, որպեսզի միջնորդությունն ուսումնասիրվի ոչ թե եռամսյա ժամկետում, այլ ավելի շուտ», — ասաց քաղաքագետ, ակցիայի նախաձեռնող Անդրանիկ Թևանյանը։
Ըստ օրենքի` միջնորդությունը ներկայացնելու պահից գործն ուսումնասիրվում է եռամսյա ժամկետում։ Միջնորդությունը ներկայացվել է ապրիլի 17-ին, և Քրեական պալատը դեռ ևս երկու ամիս ունի այն ուսումնասիրելու համար։
ՀՀ վճռաբեկ դատարանի քրեական պալատի նախագահ Սերժիկ Ավետիսյանը սխալ է համարում ցուցարարների դիրքորոշումը, քանի որ Բաբայանի գործը մի քանի օրում անհնար է լուծել։
«Գործը, ինչպես մենք արդեն հայտարարել ենք, կուսումնասիրվի եռամսյա ժամկետում։ Հաշվի առնելով պալատի ծանրաբեռնվածությունը և գործի բարդությունը` այդ ժամկետն առավել օպտիմալ է», — ասաց Ավետիսյանը։
Այս պատասխանը հավաքվածներին չբավարարեց, նրանք պահանջեցին նշել բողոքարկման ուսումնասիրման և դատավարության ստույգ ժամկետները։ Հակառակ դեպքում սպառնացին ավելի զանգվածային ակցիաներ կազմակերպել։
Բաբայանը Ղարաբաղի ՊԲ-ի հրամանատար է եղել 1993-1999 թվականներին և պաշտպանական գերատեսչության ղեկավար 1995-1999 թվականներին, մասնակցել է արցախյան զորքերի հաջողված գործողությունների գրեթե բոլորի մշակմանը, իսկ 1994 թվականին Լեռնային Ղարաբաղի անունից Հայաստանի և Ադրբեջանի հետ հրադադարի պայմանագիր է ստորագրել։
2000 թվականին դատապարտվել է 14 տարվա ազատազրկման` այն ժամանակ Արցախի ղեկավարի պաշտոնը զբաղեցնող Արկադի Ղուկասյանի վրա մահափորձ կազմակերպելու համար, սակայն 4.5 տարի անց նրան ներում է շնորհվել։
