ԵՐԵՎԱՆ, 14 մայիսի — Sputnik. «Ազատություն քաղբանտարկյալներին ու «Սասնա ծռերին» գրությամբ պաստառով այսօր առավոտից ՀՀ գլխավոր դատախազության շենքի դիմաց մի խումբ քաղաքացիներ բողոքի ակցիա են իրականացնում։
Ակցիայի մասնակիցների հիմնական պահանջը ՀՀ գլխավոր դատախազ Արթուր Դավթյանի հրաժարականն է։
Հավաքվածները «դատախազ հեռացիր» և «ազատություն քաղբանտարկյալներին» վանկարկումներով սպասում են գլխավոր դատախազի արձագանքին։
Այս պահի դրությամբ բողոքի ակցիայի մասնակիցների հետ ոչ ոք չի հանդիպել դատախազությունից։
Ակցիայի մասնակիցների թվում են նաև արցախյան ազատամարտի մի խումբ մասնակիցներ, այդ թվում`ազատամարտիկ Վոլոդյա Ավետիսյանը, որը, հիշեցնենք, մարտի 28-ին շուրջօրյա նստացույց էր սկսել Ազատության հրապարակում` բողոքելով Ժիրայր Սեֆիլյանի դատավարության ընթացքի ու Սերժ Սարգսյանի վարչապետության դեմ։
