ԵՐԵՎԱՆ, 11 մայիսի — Sputnik. Հայ օլիգարխները Նիկոլ Փաշինյանի առաջարկած աշխատանքային նոր պայմանների հետ չեն համակերպվել։ Այսօր լրագրողների հետ հանդիպմանը նման տեսակետ հայտնեց Հայաստանի գործատուների միության նախագահ Գագիկ Մակարյանը:
«Նրանց մի մասը կարող են ներգրավվել նոր կուսակցությունների ստեղծման կամ ռևանշիստական գործընթացներում։ Բայց եթե խնդիր է դրվելու, որ բիզնեսը խորհրդարան չմտնի, բիզնեսը պետք է լուրջ մտածի`տվյալ կուսակցությունն աջակցելով ու ռեսուրսներ ծախսելով ինչ կշահի ինքը»,- ասաց Մակարյանը։
Ստեղծված իրավիճակից լուծում գտնելու համար Մակարյանը Նիկոլ Փաշինյանին առաջարկում է դեմ առ դեմ հանդիպել ու առանձնազրույց ունենալ հայաստանյան խոշոր գործարարների հետ։
«Յուրաքանչյուրին բացատրել իրավիճակի փոփոխությունը, ապահովել բիզնեսի, գույքի պահպանման երաշխիքներով»,- առաջարկում է նա։
Իսկ նախկին «մեղքերից մաքրվելու» համար Գագիկ Մակարյանն օլիգարխներին առաջարկում է աջակցել պետական հիմնադրամներին ու սոցիալական ծրագրերին` դրանով իսկ վերադարձնելով պետական բյուջե չվճարված հին պարտքերը։
Հիշեցնենք`հրապարակային ելույթներում Նիկոլ Փաշինյանը որպես տնտեսական ծրագրերի հիմնաքար առաջարկել է մենաշնորհների վերացումն ու բիզնեսի և քաղաքականության տարանջատումը։
