ԵՐԵՎԱՆ, 10 մայիսի — Sputnik. Բաքուն հույս ունի, որ Արցախյան հակամարտության բանակցությունները կշարունակվեն ընթացիկ ձևաչափով։ Այս մասին հինգշաբթի ասել է Ադրբեջանի փոխարտգործնախարար Հալաֆ Հալաֆովը։ Այս մասին հայտնում են ադրբեջանական ԶԼՄ-ները։
Հալաֆովը մեկնաբանել է Փաշինյանի ասածն այն մասին, որ Լեռնային Ղարաբաղը որպես հակամարտության կողմ պետք է վերադառնա բանակցությունների սեղանի մոտ։ Միևնույն ժամանակ ՀՀ վարչապետը հիշեցրել է, որ 1992 թվականի ԵԱՀԿ ՄԽ մանդատի համաձայն` Լեռնային Ղարաբաղը հակամարտության լիիրավ կողմ է ճանաչվել։
Հալաֆովը դա նոնսենս է անվանել` հայտարարելով, որ Արցախն Ադրբեջանի տարածքն է, իսկ Ադրբեջանի տարածքը բանակցությունների կողմ լինել չի կարող։
Հիշեցնենք, որ այս պահին ղարաբաղյան հակամարտության վերաբերյալ բանակցություններն անցկացվում են 1+2+3 ձևաչափով, որպես կանոն դրանց մասնակցում են ԵԱՀԿ գործող նախագահի անձնական ներկայացուցիչ Անջեյ Կասպշիկը, Հայաստանի և Ադրբեջանի նախագահները, ինչպես նաև ԵԱՀԿ ՄԽ երեք համանախագահները (Իգոր Պոպով, Էնդրյու Շեֆեր, Ստեֆան Վիսկոնտին)։
Նախկինում Ստեփանակերտը մասնակցում էր բանակցություններին, այդ գործընթացն ավարտվեց ՀՀ երկրորդ նախագահ Ռոբերտ Քոչարյանի օրոք, որը մինչ ՀՀ նախագահ դառնալը ներկայացնում էր Արցախը եռակողմ բանակցություններում։
