ԵՐԵՎԱՆ, 9 մայիսի — Sputnik. Հայաստանում գիտության և մշակույթի ռուսական կենտրոնի (ԳՄՌԿ) տնօրեն Սերգեյ Ռիբինսկին Հաղթանակի 73-ամյակին նվիրված հիշատակի միջոցառման ժամանակ շնորհակալություն հայտնեց հայ ժողովրդին Հայրենական մեծ պատերազմում ունեցած ավանդի համար։
«Մայիսի 9-ը Ռուսաստանի, Հայաստանի տոնն է, Հայրենական մեծ պատերազմին մասնակցած ժողովուրդների տոնն է։ Հայաստանից ռազմաճակատ է մեկնել ավելի քան 650 հազար մարդ, կեսից ավելին չեն վերադարձել։ Մեզ համար սա ընդհանուր հիշողություն է, ուզում եմ երախտիքի խոսքեր ասել հայ ժողովրդին հիշատակը վառ պահելու համար», — լրագրողների հետ զրույցում ասաց Ռիբինսկին։
Ընդհանուր հիշատակի վկայությունն են Հայաստանի տարբեր անկյուններում առավոտից մեկնարկած միջոցառումները։ Ռիբինսկու խոսքով` ամենակարևորը հիշելն է։
«Որպեսզի մենք մեկ պատմություն ունենանք և այն երբեք չկեղծվի, որքան էլ դա ցանկանան որոշ մարդիկ», — ասաց Ռիբինսկին։
Նա ընդգծեց, որ յուրաքանչյուր ընտանիք իր հերոսն ունի։ Իր ընտանիքում երկու հերոս կա` հորական և մորական կողմի պապերը։
«Երկու պապս էլ պատերազմել են։ Մեկը Կարմիր Աստղի երեք շքանշան է ունեցել։ Մյուսը հրամանատար է եղել, նրա տանկը խոցել են, բայց նա ողջ է մնացել», — ասաց Ռիբինսկին։
Նա պատմեց, որ պապը միշտ արցունքն աչքերին էր հիշում ռազմաճակատային կյանքի այդ դրվագը, տանջվում էր, որ չէր կարող արագ ռազմաճակատ վերադառնալ, քանի որ լուրջ կոնտուզիա էր ստացել։
ԳՄՌԿ-ի նախաձեռնությամբ, Սիրահարների այգում կազմակերպած Հիշատակի երեկոյի շրջանակում տեսախցիկ էր տեղադրվել, և ներկաները կարող էին պատմել մարտերին մասնակցած իրենց ծնողների, պապիկների, տատիկների մասին։ Շուտով այդ պատմությունների հիման վրա «Հայրենական մեծ պատերազմի տարեգրության մեջ իմ ընտանիքի պատմությունը» խորագրով սոցիալական տեսահոլովակ է ստեղծվելու։
