ԵՐԵՎԱՆ, 8 մայիսի — Sputnik. Որպես ընդդիմություն` ՀՀԿ-ն շարունակելու է աշխատել ի բարօրություն Արցախի և Հայաստանի: Այսօր, ԱԺ-ում լրագրողների հետ զրույցում ասաց ՀՀԿ խոսնակ, ԱԺ փոխնախագահ Էդուարդ Շարմազանովը՝ հավելելով՝ «մեր աշխատանքի առանցքում լինելու է Արցախի և Հայաստանի անվտանգությունը»:
Sputnik Արմենիայի հարցին, թե որն է լինելու ընդդիմության կարգավիճակում առաջին քայլը, Էդուարդ Շարմազանովը պատասխանեց.
Դեռ կտեսնենք, մենք լինելու ենք կառուցողական ընդդիմություն` պետական մտածողությամբ»։
Շարմազանովը չբացառեց, որ ՀՀԿ-ն իր ընդդիմադիր դիրքում կաջակցի Փաշինյանի վարած քաղաքականությանը:
«Բոլոր այն ծրագրերը, որոնք բխում են մեր գաղափարախոսությունից և որոնք չեն սպառնա Հայաստանի ու Արցախի անվտանգությանը, մենք կօժանդակենք՝ անկախ նրանից` Փաշինյանն է անում, թե մեկ այլ մարդ: Մենք, որպես ընդդիմություն, դեմ կլինենք բոլոր այն ծրագրերին, որոնք չեն բխի Արցախի ու Հայաստանի շահերից: Մենք ինքնանպատակ դեմ չենք լինի, ինքնանպատակ կողմ չենք լինի: Մեր մեջ որևէ ռևանշիզմ չկա»,- ասաց նա:
Փաշինյանի ելույթում նշված ծրագրային դրույթների ու դրանց վերաբերյալ ՀՀԿ տեսակետի մասին հարցին Շարմազանովը պատասխանեց.
«Փաշինյանի ելույթում ծրագրային դրույթներ ես չտեսա: Դրանք բարի ցանկություններ էին, որոնք տանում են դեպի երջանկություն, բայց ես չլսեցի` ինչպես»:
Իսկ ինչ վերաբերում է Նիկոլ Փաշինյանի կառավարության ծրագրին, Շարմազանովը չցանկացավ վաղաժամ ենթադրություններ անել՝ նշելով, որ երբ այն կներկայացվի, այդ ժամանակ էլ կքննարկեն:
