ԵՐԵՎԱՆ, 5 մայիսի — Sputnik. Երևանում մայիսի 1-ին տեղի ունեցած բողոքի ակցիայի լուսանկարն ընդգրկվել է Financial Times պարբերականի ընտրած լավագույն լուսանկարների ցանկում։ Երևանյան լուսանկարի հեղինակը Reuters միջազգային գործակալության կիևցի ֆոտոլրագրող Գլեբ Գարանիչն է։
«Ընդդիմության հանրահավաք։ Հայաստանի ընդդիմության առաջնորդ Նիկոլ Փաշինյանի կողմնակիցները դուրս են եկել փողոց, երբ պատգամավորը չի ընտրվել վարչապետի պաշտոնում։ Երևան, Հայաստան», — մակագրված է լուսանկարը։
Գործակալության խմբագիրների կազմում լուսանկարների շարքում է հայտնվել նաև Ստամբուլում մայիսի 1-ին թուրք ոստիկանների կողմից ակտիվիստի ձերբակալությունը։
Եվս մեկ հետաքրքիր լուսանկար՝ Վենեսուելայի նախագահ Նիկոլաս Մադուրոն ողջունում է իր կողմնակիցներին Քարորում նախընտրական միջոցառման ժամանակ։ Հիշվող լուսանկարներից մեկում էլ կին է պատկերված, որի դեմքը կանաչ է ներկված։ Կնոջը վհուկի կերպարով նկարել են Անգլիայում դրուիդների և հեթանոսների ազգային տոնի ժամանակ։
FT ֆոտոընտրանու մեջ ներառվել են նաև Հռոմում Ռոմա-Լիվերպուլ հանդիպման լուսանկարները, Լոնդոնի Tate Modern մոդեռն և ժամանակակից արվեստի թանգարանի անսովոր տիկնիկները։
