ԵՐԵՎԱՆ, 4 մայիսի — Sputnik. Ռուսաստանի և Ղազախստանի նախագահները քննարկել են Հայաստանում տիրող ներքաղաքական իրավիճակը։ Այս մասին այսօր հայտնել է Ղազախստանի առաջնորդի մամուլի ծառայությունը։
Վլադիմիր Պուտինն ու Նուրսուլթան Նազարբաևը հեռախոսազրույց են ունեցել, որի ընթացքում շնորհավորանքներ են փոխանակել Հայրենական մեծ պատերազմում տարած հաղթանակի օրվա հետ կապված։
«Զրույցի ընթացքում Ղազախստանի և Ռուսաստանի նախագահները քննարկել են երկկողմ համագործակցության ընթացիկ վիճակն ու հեռանկարները, ինչպես նաև տարածաշրջանային և միջազգային օրակարգի արդիական հարցեր, այդ թվում` Հայաստանում տիրող իրավիճակը», – նշված է հաղորդագրության մեջ։
Պետության ղեկավարները քննարկել են նաև առաջիկա հանդիպումների գրաֆիկը, այդ թվում` ընթացիկ տարվա մայիսի 14-ին Սոչիում կայանալիք Եվրասիական տնտեսական խորհրդի բարձրագույն նիստին նախապատրաստվելու ընթացքը։
Հիշեցնենք, որ Հայաստանում բողոքի զանգվածային ցույցերը սկսվել էին ապրիլի 13-ին, մարդիկ փողոց էին դուրս եկել` պահանջելով նախկին նախագահ, վարչապետ Սերժ Սարգսյանի հրաժարականը։ Ապրիլի 23-ին Սարգսյանը հրաժարական տվեց։
Մայիսի 1-ից հետո, երբ խորհրդարանն ընդդիմադիր առաջնորդ Նիկոլ Փաշինյանին չընտրեց նոր վարչապետ, Փաշինյանը կոչ արեց համընդհանուր գործադուլ և դասադուլ անել։ Մայիսի 2-ին ընդդիմության կողմնակիցները փակեցին հիմնական ու երկրորդական ավտոճանապարհները, որից հետո իշխող կուսակցությունը որոշում կայացրեց աջակցել ժողովրդի թեկնածուին։ Վարչապետի նոր ընտրությունները տեղի են ունենալու մայիսի 8-ին։
