ԵՐԵՎԱՆ, 4 մայիսի — Sputnik. Հայաստանում տեղի ունեցած «Թավշյա հեղափոխությանը» աշխարհի անդրադարձը կարելի է համեմատել միայն 2015 թվականին պատմական հայրենիք Քիմ Քարդաշյանի այցի հետ։ Սակայն երկու այդ իրադարձությունները բացարձակ տարբեր մեսիջներ են պարունակում։ Այս մասին լրագրողների հետ հանդիպմանն ասաց «Հայկական PR ասոցիացիա» ՀԿ–ի նախագահ Աստղիկ Ավետիսյանը։
PR–ի ոլորտի փորձագետը հիշեցրեց, որ Հայաստան` Քիմ Քարդաշյանի այցի ժամանակ ամերիկահայ հեռուստաաստղի ամեն քայլափոխը մի շարք հրապարակումների առիթ էր դառնում։
Բացի այդ, երկիրը հայտնվում էր միջազգային տեղեկատվական գործակալությունների թիրախում Ցեղասպանության 100-ամյա տարելիցի, ինչպես նաև Aurora Prize for Awakening Humanity մրցանակաբաշխության ժամանակ։
Հանրապետությունում ստեղծված ներկայիս իրավիճակը նույնպես լայն ռեզոնանս է ստացել աշխարհում. աշխարհի տարբեր ծայրերից Երևան են ժամանել ԶԼՄ–ների ներկայացուցիչներ և մինչ օրս լուսաբանում են դեպքերի զարգացումները։
Այնուամենայնիվ, ՀԿ–ի ղեկավարը հավասարության նշան չի դնում հնչեղություն ստացած, սակայն իրենց էությամբ այդքան տարբեր երկու իրադարձությունների միջև։
«Քիմ Քարդաշյանի այցը այլ մեսիջ էր պարունակում, «Իմ քայլը» ակցիան` լրիվ այլ», – պարզաբանեց Ավետիսյանը։
Նա ավելացրեց, որ երկու այդ իրադարձությունները կարելի է համեմատել միայն մամուլում լուսաբանման մակարդակի տեսանկյունից։
Այս հետաքրքրությունն առաջին հերթին կապված է նրա հետ, որ աշխարհում ոչ ոք պատկերացնել անգամ չէր կարող, որ հետխորհրդային երկրում հեղափոխություն կարելի է իրականացնել առանց արյունահեղության, կարծում է ՀԿ–ի ղեկավարը։
«Մեզ հաջողվեց կոտրել կարծրատիպերը և ցույց տալ, որ միավորվելով կարելի է ինչ–որ բանի հասնել», – ասաց Ավետիսյանը։
Ավետիսյանը համոզված է, որ մարդկանց փողոց դուրս գալու պատճառը այնքան Փաշինյանը չէ, որքան այն անդունդը, որը առաջացել է ժողովրդի և իշխանության միջև։ Իշխանությունները երկար տարիների հաշվի չէին առնում ժողովրդի իրական կարիքները։ Նման վերաբերմունքը` իշխանության կողմից բացարձակ անտարբերությունը, երկար շարունակվել չէր կարող, ինչ-որ մի օր դա պետք է վերածվեր զանգվածային բողոքների, նշում է կազմակերպության ղեկավարը։
Ընդդիմադիր առաջնորդի գործողությունները վերլուծելիս` Ավետիսյանը եկավ այն եզրակացության, որ Փաշինյանն իր քայլերով վաստակեց ժողովրդի վստահությունը։ Մասնավորապես, նա երկու շաբաթվա ընթացքում քաղաքներ էր այցելում, շփվում էր մարդկանց հետ, հարցուփորձ անում իրենց խնդիրների և մտավախությունների վերաբերյալ։ Հետագայում ընդդիմադիրն այդ հարցերն ու պահանջները բարձրաձայնեց Հանրապետության հրապարակում կազմակերպված ցույցերի ընթացքում։
«Փաշինյանը ժողովրդին վստահություն ներշնչեց` ցույց տալով, որ ինքը նրանցից մեկն է։ Նա օգնեց ժողովրդին հավատալ իրեն և նրան, որ Հայաստանում ցանկության դեպքում կարելի է ինչ-որ բան փոխել», – ասաց Ավետիսյանը։
Նրա խոսքով` այժմ Փաշինյանը փոխել է իմիջը` խռովարարից դարձել է իր ամեն խոսքը կշռադատող մարդ։
Ավետիսյանը նաև ավելացրեց, որ Փաշինյանը ճիշտ մարտավարություն է որդեգրել` տարբեր սոցիալական խավերից շարժմանը որքան հնարավոր է շատ մարդ ներգրավելով և Երևանում ապակենտրոնացված ակցիաներ անցկացնելով։
Հիշեցնենք, որ Հայաստանում բողոքի զանգվածային ցույցերը սկսվել էին ապրիլի 13-ին, մարդիկ փողոց էին դուրս եկել` պահանջելով նախկին նախագահ, վարչապետ Սերժ Սարգսյանի հրաժարականը։ Ապրիլի 23-ին Սարգսյանը հրաժարական տվեց։
Մայիսի 1-ից հետո, երբ խորհրդարանն ընդդիմադիր առաջնորդ Նիկոլ Փաշինյանին չընտրեց նոր վարչապետ, Փաշինյանը կոչ արեց համընդհանուր գործադուլ և դասադուլ անել։ Մայիսի 2-ին ընդդիմության կողմնակիցները փակեցին հիմնական ու երկրորդական ավտոճանապարհները, որից հետո իշխող կուսակցությունը որոշում կայացրեց աջակցել ժողովրդի թեկնածուին։ Վարչապետի նոր ընտրությունները տեղի են ունենալու մայիսի 8-ին։
