ԵՐԵՎԱՆ, 1 մայիսի — Sputnik. ՀՀ վարչապետի թեկնածու «Ելք» խմբակցության ղեկավար Նիկոլ Փաշինյանը իր ելույթում նշեց, որ միայն անձերի փոփոխությամբ երկրում հասունացած համակարգային խնդիրները չեն լուծվի։
«Նման կերպ մտածողները հաշվի չէին առել մի հանգամանք, որ «Քայլ արա, մերժիր Սերժին» կարգախոսն ուղղված էր այն համակարգի դեմ, որը ղեկավարում էր Սերժ Սարգսյանը։ Ուրեմն ժողովրդի նպատակը ոչ թե մի անձին մյուսով փոխարինելն է, այլ համակարգային փոփոխությունը։ Այս պատճառով ՀՀ 1–ին փոխվարչապետ Կարեն Կարապետյանի թեկնածության առաջադրումը ժողովրդին էլ ավելի գրգռեց»,–ասաց Փաշինյանը` նշելով, որ իրադարձությունները զարգացան այնպես, որ համաժողովրդական շարժումն ինքը վարչապետի թեկնածու առաջադրեց։
«Բայց հանրապետական վերնախավը` Սերժ Սարգսյանի գլխավորությամբ, շարունակում է մուկն ու կատու խաղալ ժողովրդի հետ և մինչ այս պահը չի հայտարարել, որ համաձայն է քվեարկել ժողովրդի թեկնածուի օգտին»,–հիշեցրեց վարչապետի թեկնածուն։
Նա նշեց, որ իրենք իրենց քայլերով ստեղծել են համապատասխան պայմաններ Սերժ Սարգսյանի և հանրապետականների արժանապատիվ հեռացման համար, սակայն, «օդից կախված լուրերի» համաձայն` նրանք երեկվանից` Ռոբերտ Քոչարյանի և Սերժ Սարգսյանի գլխավորությամբ, շարունակում են այնպես անել, որ տարբեր կուսակցություններ չքվեարկեն ժողովրդի թեկնածուի օգտին։
«Սթափվեք, քանի դեռ ուշ չէ, որովհետև ձեր այդ պայքարը կարող է քաղաքական ցունամի դառնալ` բառիս բուն իմաստով»,–զգուշացրեց Նիկոլ Փաշինյանը` ժողովրդին կրկին հորդորելով փողոց դուրս գալ և պայքարել։
Փաշինյանը դիմեց նաև ԱԺ պատգամավորներին, այդ թվում՝ իր բնորոշմամբ` բարիկադների հակառակ կողմում գտնվողներին: «Այստեղ չի լուծվում որևէ մեկի անձնական հարցը, լուծվում է ՀՀ և ԼՂ հաղթանակի հարցը: Որևէ զոհողություն չի պահանջնվում, այլ միայն կողմ քվեարկել ժողովրդական թեկնածուի օգտին ու քանդել օտարվածխության պատնեշը, որ գոյություն ունի ձեր ու ժողովրդի միջև:
ՀՀ վարչապետի թեկնածու Նիկոլ Փաշինյանն իր ելույթում անդրադարձավ տնտեսական խնդիրներին, մասնավորապես՝ վարկերի բարձր տոկոսադրույքներին ու խիստ պայմանները պարզեցնելու անհրաժեշտությանը:
«Մենք պետք է փոխենք ՀՀ քաղաքացու նկատմամբ վերաբերմունքը, երբ քաղաքացին նրա համար է, որ խախտում անի ու տուգանվի»,- ասաց նա:
Անդրադառնալով արտաքին քաղաքականությանը` Փաշինյանը վերահաստատեց վերջին օրերին արդեն արված հայտարարություններն այն մասին, որ ՀՀ արտաքին քաղաքականության վեկտորը փոխելու ծրագիր չունի, շարունակելու է խորացնել հարաբերություններն ինչպես ԵԱՏՄ–ի և ՀԱՊԿ–ի, այնպես էլ ԵՄ–ի հետ:
Վարչապետի թեկնածուն անդրադարձավ նաև Իրանի ու Վրաստանի հետ հարաբերությունները խորացնելու անհրաժեշտությանը, ինչը կարևոր նշանակություն ունի ՀՀ տնտեսության համար:
Ժողովրդական շարժման ու ժողովրդավարության հաղթանակը, Նիկոլ Փաշինյանի համոզմամբ, իր դրական ազդեցություն է ունենալու ոչ միայն Հայաստանի միջազգային վարկանիշի, այլև ԼՂ խնդրի հայանպաստ լուծման համար:
