ԵՐԵՎԱՆ, 28 ապրիլի – Sputnik, Լաուրա Սարգսյան. Բիձինա Իվանիշվիլիի քաղաքականություն վերադառնալու որոշումը ոչ մի կապ չունի վերջերս Հայաստանում տեղի ունեցած իրադարձությունների հետ, որոնք «թավշյա հեղափոխություն» են անվանում։ Սրանում համոզված են փորձագետները Թբիլիսիում ու Երևանում։
«Վրացական երազանք — Ժողովրդավարական Վրաստան» կուսակցության հիմնադիր, միլիարդատեր Բիձինա Իվանիշվիլին օրերս հայտնեց, որ քաղաքականություն է վերադառնում։ Վրաստանի նախկին նախագահ Միխեիլ Սահակաշվիլին դրանում ուղիղ կապ է տեսել Հայաստանի «թավշյա հեղափոխության» հետ, ինչի մասին գրել է իր ֆեյսբուքյան էջում։
Սահակաշվիլին կարծում է, որ Իվանիշվիլին վախեցած է, որ Հայաստանում օլիգարխիային գահընկեց արեցին ու չի ուզում թույլ տալ, որ Վրաստանում նույն սցենարը կրկնվի։
Փորձագետներն ինչպես Վրաստանում, այնպես էլ Հայաստանում շնորհազուրկ նախագահի կարծիքը անհիմն են համարում։
«Ի տարբերություն նախկին նախագահ Սահակաշվիլու, ես Հայաստանի իրադարձությունների ու Իվանիշվիլիի քաղաքականություն վերադառնալու մեջ ուղիղ կապ չեմ տեսնում ։ Դա պարզապես զուգադիպություն է, ոչ ավելին», – Sputnik Արմենիայի հետ զրույցում ասաց Վրաստանի հարցերով փորձագետ Ջոնի Մելիքյանը։
Փորձագետը համոզված է, որ Թբիլիսին իսկապես ուշադիր հետևում է Հայաստանում տիրող իրավիճակին։ Սակայն Երևանի իրադարձությունները լավագույն դեպքում կարող են ստիպել «Վրացական երազանք» իշխող կուսակցությանը մտածել հասարակությունում իրենց հեղինակության բարձրացման մասին։
Մելիքյանը դրական գնահատեց Իվանվիշվիլիի վերադարձը հայ-վրացական հարաբերությունների տեսակետից, քանի որ նրա օրոք երկրների միջև համագործակցությունը ակտիվորեն զարգանում էր։ Մտերմացման ուղղությունը բռնել էին նաև վարչապետներ Իրակլի Ղարիբաշվիլին ու Գեորգի Կվիրիկաշվիլին։
Երևանը նույնպես դիտարկում է Թբիլիսիին որպես կարևոր գործընկեր։ Փորձագետը կարծում է, որ նույնիսկ Հայաստանի իշխանափոխությունը ոչ մի կերպ չի ազդի հայ–վրացական հարաբերությունների վրա։
«Հաստատված շփում, հարաբերություններ կան, որոնք շարունակելու են զարգանալ հօգուտ երկու երկրների», – ընդգծեց Մելիքյանը։
Վրաստանի նախագահի աշխատակազմի նախկին պետ Պետրե Մամրաձեն համամիտ է հայ փորձագետի հետ։ Հա համոզված է, որ Սահակաշվիլիի տարածած լուրերը նրա հերթական սուտն է։
Իվանաշվիլին վերադառնում է` իր իսկ կուսակցությունը ղեկավարելու, քանի որ վերջերս տարբեր ներկուսակցական խմբերի տարաձայնությունները շատացել են։
«Որքան էլ Իվանաշվիլին փորձի հրաժարվել քաղաքական ու պետական գործունեությունից, հիմա նա ստիպված է վերադառնալ կուսակցության նախագահի պաշտոնին»,– ասաց Մամրաձեն Sputnik Արմենիայի հետ հարցազրույցում։
Փորձագետը կարծում է, որ Իվանիշվիլին խորհրդատվություններ է անցկացնելու կուսակցության ղեկավար կազմերի հետ` պառակտումից խուսափելու համար։
Բացի այդ, շատ փորձագետներ կանխատեսում են, որ Իվանիշվիլին կդառնա կա՛մ նախագահ, կա՛մ վարչապետ։
Իվանիշվիլին քաղաքականություն էր եկել 2011 թվականին` հիմնելով «Վրացական երազանք – ժողովրդավարական Վրաստան» կուսակցությունը։ 2012 թվականի խորհրդարանական ընտրությունների քաղաքականություն էր եկել 2011 թվականին` հիմնելով «Վրացական երազանք – ժողովրդավարական Վրաստան» կուսակցությունը։ 2012 թվականի խորհրդարանական ընտրությունների արդյունքում կուսակցությունն այլ ընդդիմադիր կուսակցությունների հետ դաշինք կազմեց ու իշխանության եկավ։ Այսպես` ավարտվեց երրորդ նախագահ Սահակաշվիլու 9 տարի տևած «Ազգային շարժում» կառավարումը։
2013 թվականին, երբ «Վրացական երազանքի» թեկնածու Գեորգի Մարգվելաշվիլին հաղթեց նախագահական ընտրություններում, Իվանիշվիլին գնաց քաղաքականությունից։ Այդ ժամանակ նա ասաց, որ իր հիմանական խնդիրը լուծված է։
Այնուամենայնիվ, ընդդիմությունը պնդում է, որ նա կուլիսների հետևից ղեկավարում է երկիրը։
