ԵՐԵՎԱՆ, 28 ապրիլի – Sputnik. ՀՀԿ-ն թեկնածու չի առաջադրում: Այս մասին այսօր լրագրողներին հայտնեց ՀՀԿ մամուլի խոսնակ Էդուարդ Շարմազանովը` ավելացնելով, որ նման որոշում է կայացվել երկիրը ցնցումների չտանելու համար։
«Ում կքվեարկենք դեռ չենք որոշել։ Դեռ չգիտենք Փաշինյանից զատ այլ թեկնածու կա, թե չկա։ Խմբակցությունը պետք է լինի միասնական, բայց Սահմանադրությամբ պատգամավորը կաշկանդված չէ և կարող է քվեարկել իր ցանկությամբ»,-ասաց Շարմազանովը` հավելելով, որ այդուհանդերձ ճիշտը միասնական որոշման գալը։
«Այս պահից կսկսենք քննարկումները կուսակցության ներսում»,-նշեց ԱԺ փոխխոսնակը։
Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։
Հաջորդիվ «Իմ քայլը» նախաձեռնությունը պայքարում էր, որ իշխող ՀՀԿ–ն չառաջադրի վարչապետի իր թեկնածուին։ Ապրիլի 25–ից նրանք կրկին բողոքի ակցիաներ ու հանրահավաքներ են անցկանում ոչ միայն Երևանում, նաև` ՀՀ այլ քաղաքներում։
