ԵՐԵՎԱՆ, 26 ապրիլի — Sputnik. Ժողովրդական շարժման մասնակիցն այսուհետ չի հանդուրժելու իր անունից հանդես եկող ու լկտի դրսևորումներ թույլ տվողներին: Այս մասին այսօր հայտարարեց «Իմ քայլը» նախաձեռնության առաջնորդ Նիկոլ Փաշինյանը:
Առաջինը Փաշինյանը շարժման տրամաբանությունից դուրս որակեց առանց պետհամարանիշներով երթևեկող ավտոմեքենաները՝ կոչ անելով այսուհետ ժողովրդական շարժման անունից պայքարել դրանց դեմ:
Փաշինյանը կարևորեց նաև որոշ ավտոճանապարհների ՝ մասնավորապես դեպի Արցախ տանող կարևոր ռազմավարական ճանապարհների անխափան աշխատանքը:
«Սոթք-Քարվաճառ և Գորիս-Բերձոր ավտոճանապարհները պետք է միշտ բաց լինեն»,- ասաց նա հավելելով, որ ավելորդ է համարում հիշեցնել նաև շտապօգնության ու ԱԻՆ ավտոմեքենաների ճանապարհները փակելու անթույլատրելիության մասին:
Ինչ վերաբերում է հետագա օրերին, Փաշինյանը հայտարարեց, որ վաղը Երևանը հանգստանում է, Երևանում ակցիաները ժամանակավորապես դադարեցվում են: Երեկոյան ավանդական հանրահավաքը վաղը կկայանա Գյումրիում, շաբաթ օրը՝ Վանաձորում:
