ԵՐԵՎԱՆ, 25 ապրիլի — Sputnik. ՀՀ գլխավոր դատախազությունը «Սևան ազգային պարկի» ղեկավարության նկատմամբ քրեական գործ է հարուցել։ Պաշտոնական տեղեկատվության համաձայն` պաշտոնատար անձինք պաշտոնեական կեղծիք են թույլ տվել թերի իրականացված աշխատանքները ընդունելով որպես լիարժեք, ինչով էական վնաս են պատճառել պետության գույքային շահերին, ստորագրել և հաստատել են ակնհայտ կեղծ տեղեկություններ բովանդակող պաշտոնական փաստաթղթեր՝ կատարողական ակտեր, հանձնման-ընդունման արձանագրություններ:
Քրեական գործը հարուցվել է ՀՀ վերահսկիչ պալատի բացահայտած փաստերի հիման վրա։ Թե կոնկրետ ինչ փաստերի մասին է խոսքը, Գլխավոր դատախազությունը չի մանրամասնում, չեն հրապարակվում նաև պաշտոնյաների անունները։
Մամուլի հրապարակումների համաձայն` Վերահսկիչ պալատը «Սևան» ԱՊ-ում կատարած ստուգումների արդյունքում մեծ չափերի հասնող չարաշահումներ էր հայտնաբերել։
Ազգային պարկը տնկիներ գնելու պայմանագրեր է կազմել, բայց իրականում դրանք ձեռք չի բերել: Ընդ որում, պայմանագրերը կնքել է ազգային պարկի տնօրեն Վահե Գուլանյանի հետ փոխկապակցված անձի ընկերության հետ:
Բացի այդ, Գուլանյանը ներդրումներ անելու նպատակով կառավարության պահուստային ֆոնդից մի քանի հարյուր միլիոն դրամ է ստացել, որով միայն մի պարիսպ է կառուցել։ Եվ սա դեռ ամբողջը չէ։
Քրեական գործի նախաքննությունը հանձնարարվել է ՀՀ քննչական կոմիտեին։
