ԵՐԵՎԱՆ, 21 ապրիլի — Sputnik. Ընդդիմության հանրահավաքն ապրիլի 21-ին, ինչպես և հայտարարվել էր, մեկնարկեց Նոր Նորք վարչական շրջանից։ Բայց ոչ թե 7-րդ, այլ 6-րդ զանգվածի տարածքից։
Այստեղ կուտակված ոստիկանության մեծաթիվ ուժերը թույլ չտվեցին ցույցի մասնակիցներին դուրս գալ Գայի պողոտայի երթևեկելի գոտի։ Երևանի փոխոստիկանապետ Վալերի Օսիպյանը ԱԺ պատգամավոր Նիկոլ Փաշինյանին զգուշացրեց, որ նրան կարող են հեռացնել տարածքից, քանի որ հավաքն ապօրինի է։ Ի պատասխան Փաշինյանն իր կողմնակիցներին կոչ արեց. «Եթե նման բան լինի, դուրս եկեք փողոց, քաղաքի բոլոր հատվածներում փակեք փողոցները, որպեսզի ոստիկանությունը չկարողանա կենտրոնացնել ուժերը, և փակեք պետական բոլոր հիմնարկները։
Ոստիկանությունը սկսեց բերման ենթարկել ակցիայի մասնակիցներին։ Սկսվեց հրմշտոց, ցուցարարներից մեկը հարվածեց ոստիկանին, գցեց գետնին։ Ոստիկանի ինքնազգացողությունը վատացավ։ Ծառայակիցները նրա թևերից բռնեցին ու դուրս բերեցին մարդկանց միջից։
Փաշինյանը հայտարարեց, որ նա, ով հարվածում է ոստիկանին, սադրիչ է, նրան պետք է դուրս հանել ցուցարարների շարքերից։
Լարված իրավիճակը Նոր Նորքում շարունակվում է, ոստիկանները փակ են պահում ցուցարարների ճանապարհը դեպի փողոց։ Ցուցարարներն ու ոստիկաններն այս պահին Նոր Նորքի 6-րդ զանգվածի «Տիտան» խանութի հարակից հատվածում են։
