ԵՐԵՎԱՆ, 21 ապրիլի — Sputnik. Շիրակի մարզի Մեծ Մանթաշ գյուղի բնակիչները փակել են Երևան տանող ճանապարհը: Այս մասին հայտնում է Sputnik Արմենիայի թղթակիցը Գյումրիից։
Արդեն ավելի քան երկու ժամ է բնակիչները փակ են պահում Գյումրի-երևան ճանապարհի Մանթաշ գյուղի հատվածը:
Նրանց են միացել նաև հարևան գյուղերի բնակիչները:
Այս պահին ավտոերթ է նախապատրաստվում նաև Գյումրիում:
Նշենք, որ բողոքի ցույցեր են անցկացվում նաև Արարատում, Վանաձորում, Էջմիածնում։
Ապրիլի 17-ին Ազգային ժողովում անցկացված քվեարկության ժամանակ ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյանն ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։ Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։
