ԵՐԵՎԱՆ, 15 ապրիլի — Sputnik. Երևանի Ֆրանսիայի հրապարակում այս պահին ընթացող հանրահավաքին «Ելք» խմբակցության պատգամավոր, բողոքի ակցիայի կազմակերպիչ Նիկոլ Փաշինյանն ասաց, որ իրենց գործողությունների առաջին փուլն ավարտվեց, իսկ արդյունքն այն է, որ համատարած համակրանք կա ՀՀ քաղաքացիների կողմից:
«Մեր խնդիրն է վերածել համակրանքը կոնկրետ քաղաքական գործողությունների: Ես հայտարարում եմ քաղաքացիական անհնազանդության գործողությունների ծրագիր, որը պետք է իրականացնեն քաղաքացիները: Պետք է սկսվեն զանգվածային քաղաքացիական անհնազանդությունների գործողություններ: Դրանք պետք է անեք դուք, սիրելի հայրենակիցներ»,- ասաց նա:
Նիկոլ Փաշինյանի խոսքն ընդհատվեց մի կին։ Նա դուրս եկավ հարթակ ու ասաց, որ 700 միլիոն գումար է տալիս, բայց խնդրում է չսկսել, որովհետև մարդու կյանքը ամենից թանկն է: Կնոջը հեռացրին հարթակից:
Նիկոլ Փաշինյանը հայտարարեց, որ սկսվում է քաղաքացիական անհնազանդությունների շարք։ Վաղվա քաղաքացիական անհնազանդության ծրագիրը, որը պետք է վերածվի տրասնպորտային կոլապսի, կմեկնարկի առավոտյան 8։15–ին։
Նախ պետք է արգելափակել Երևանի կամուրջները։
«Խոսքը Դավիթաշեն, Հաղթանակի, Կիևյան կամուրջների մասին է: Այն քաղաքացիները, ովքեր այդ կամուրջով երթևեկում են, նրանք պարզապես վթարայինները միացնում են, դռները փակում են ու ոտքով շարժվում են դեպի Ազգային ժողով, դեպի Բաղրամյան: Ճանապարհին ում տեսնում են ասում են, որ ժողովուրդը հավաքվում է ԱԺ մերձակայքում»,- մանրամասնեց Փաշինյանը:
Նա առաջարկեց վաղը երեխաներին դպրոց ու մանկապարտեզ չուղարկել, իսկ ճանապարհները փակելու արդյունքում մարդիկ չեն կարողանա նաև աշխատանքի գնալ ու կմիանան իրենց պայքարին։
Պատգամավորը հավելեց, որ մետրոյի աշխատանքն էլ պետք է արգելափակել. «Մետրոյի ուղևորները դուրս են գալիս ու ոտքով գալիս են Բաղրամյան: Այս ընթացքում ում տեսնում են, ասում են, որ ժողովուրդը հավաքվում է Ազգային ժողովի մոտ: Բոլորին իրազեկեք, որ ժողովուրդը հավաքվում է ԱԺ–ի մոտ»։
Նա հորդորեց պառկել մետրոյի դռների մոտ, ավտոբուսների, տրոլեյբուսների դիմաց։ Ուսանողներին նա խորհուրդ տվեց դասադուլ անել և միանա բողոքի ակցիային։
