ԵՐԵՎԱՆ, 15 ապրիլի — Sputnik. Ֆրանսիայի հրապարակում ժամը 18։30–ին մեկնարկել է երեկոյան հանրահավաքը:
Սփյուռքահայ գործարար, հասարակական քաղաքական գործիչ Զարեհ Պալյանը, ելույթ ունենալով ասաց, որ Հայաստանում ու սփյուռքում բացասական երևույթներն արմատախիլ անելու ժամանակն է:
«Ես մի պարզ հայ եմ, կուզեի խոսել բարոյական հարցերի մասին: Շատ կարևոր է այս պահին վերահաստատել մեր հոգեբարոյական արժեքները Հայաստանում ու սփյուռքում, արմատախիլ անել բացասական երևույթները»,- ասաց Զարեհ Պալյանը:
Բողոքի ակցիայի և «Ելքի» ղեկավար Նիկոլ Փաշինյանն ասաց, որ շատ նամակներ է ստանում, բայց պիտի անդրադառնա դրանցից մեկին։ «Մեզ հարցնում են` Շանթ Հարությունյանին, Ժիրայր Սեֆիլյանին և նրանց կողմնակիցներին քաղբանտարկյալ համարում ենք, թե՞ ոչ։ Այո, բոլոր մեր այդ ընկերները բանտում են հայտնվել Սերժ Սարգսյանի ստեղծած ստահոդ դատարանների գործողությունների արդյունքում։ Եվ մեր պայքարի նպատակներից մեկը նրանց ազատումն է»,–նշեց Նիկոլ Փաշինյանը։
Նա հիշեցրեց, որ իրենց պայքարի պատմությունը սկսվել է 2014–ի ապրիլից, երբ Սերժ Սարգսյանը, սկսելով սահմանադրական բարեփոխումների գործընթացը և պատասխանելով հանրության մտահոգությանը, որ դա անում է իր իշխանությունը երկարաձգելու նպատակով, ասել է.«Պաշտոնապես հայտարարում եմ, որ ես` Սերժ Սարգսյանս, այլևս չեմ առաջադրվի ՀՀ նախագահի պաշտոնում, չեմ հավակնի նաև վարչապետի պաշտոնին։ Վստահ եմ, որ մեկ մարդը իր կյանքում 2 անգամից ավելի չպետք է հավակնի երկրի կառավարման ղեկին Հայաստանում»։
Հանրահավաքի կազմակերպիչը հիշեցրեց, որ 2018թ.–ի ապրիլի 9–ին Սերժ Սարգսյանի ֆորմալ նախագահության ժամկետն ավարտվել է։ Եվ, նրա խոսքով, այսօր նա ՀՀ–ում չունի ոչ մի պետական պաշտոն։ Ավելին` այսօր նա ՀՀ–ում Ոստիկանության կամ ԱԱԾ–ի համար գերագույն գլխավոր հրամանատար չէ։
«Հայաստանում առաջին անգամ տեղի է ունենում աննախադեպ մի բան, նույն մարդը 3–րդ անգամ ղեկավարելու է այս երկիրը։ Բայց խնդիրն այն է, որ 3–րդ անգամը անգամ վերջինը չէ, որովհետև այլևս վերանում է սահմանադրական արգելքը»,–ասաց Փաշինյանը և հավելեց, որ Հայաստանն Ադրբեջան չէ, որ նախագահը կնոջը իրեն տեղակալ նշանակի, իսկ որդուն պատրաստի նախագահ դառնալու։
Ապա` Նիկոլ Փաշինյանը ներկայացրեց վաղվա իրենց քաղաքացիական անհնազանդությունների ծրագիրը, որը պետք է մեկնարկի առավոտյան ժամը 8։15–ից։
