ԵՐԵՎԱՆ, 10 ապրիլի — Sputnik. Հայկական ծագում ունեցող նախկին «օրենքով գող» Վարդան Ասատրյանը Մոսկվայի Պրեսնենի դատարանի որոշմամբ երկու ամսով կալանավորվել է։ Նա մեղադրվում է առանձնակի մեծ քանակությամբ թմրանյութերի ապօրինի պահմանման մեջ։ Այս մասին հայտնում է «Փրամ Քրայմ» պարբերականը։
Աղբյուրի տվյալներով` Ասատրյանին ձերբակալել են ապրիլի 6–ին, նրա մոտ 15 գրամ հերոին են հայտնաբերել։ Եթե կասկածյալի մեղքն ապացուցվի, Բջեին 10 տարի ազատազրկում է սպասվում։
Վարդան Ասատրյանը, որը քրեական աշխարհում հայտնի է Բջե մականունով, «թագադրվել» է 1998 թվականին Երևանում։ Հետո նա Ռուսաստան է տեղափոխվել ու հիմնվել Տոմսկում, նաև երբեմն Սոչի էր գնում։ Նա 10 տարի շարունակ «օրենքով գող» էր։ Այդ ընթացքում նրան պարբերաբար «բռնացնում» էին հերոինով։
2008 թվականին Դեդ Հասանը «գահընկեց» էր արել Բջեին, քանի որ նա երեխաների առևանգմամբ էր զբաղվում։ «Գողական աշխարհում» այդ արարքը չի ողջունվում։ Մի շարք ԶԼՄ–ների տվյալներով` Բջեն կազմակերպում էր հայ գործարարների երեխաների առևանգումը, որից հետո նրանց մոտ էր գնում, ներկայանում որպես «միջնորդ», որը պատրաստ է մարդկանց օգնել այս բարդ իրավիճակում։ Բայց երեխաների համար ծնողների վճարած փրկագնի մեծ մասը Բջեն իրեն էր պահում։
2008 թվականին նրա զոհերից մեկը կապ է հաստատել քրեական աշխարհի պատրիարք Դեդ Հասանի (Ասլան Ուսոյան) հետ ու խնդրել է «միջնորդի» հարցերը լուծել։ Արդյունքում, Դեդ Հասանը կանչել էր Բջեին, ապտակել նրան ու անձամբ զրկել «գողականի» կարգավիճակից։
2013 թվականին` Դեդ Հասանի մահից հետո, Բջեն փորձում էր վերադարձնել գողական աշխարհում իր բարձրագույն տիտղոսը, սակայն այլ «գողերը» չընդունեցին նրան։ Մասնավորապես, հայտնի է, որ «օրենքով գող» Սերգեյ Ասատրանը (Օսետրինա Մլադշին) այլ գողերի ներկայությամբ ծեծել է Բջեին։
