ԵՐԵՎԱՆ, 8 ապրիլի —Sputnik. Մյունսթերում մարդկանց վրաերթի ենթարկած բեռնատարի վարորդը սուիցիդալ հակումներ է ունեցել։ Այս մասին հայտնում է Mash տելեգրամ ալիքը։
Ինչպես հայտնում է ՌԻԱ Նովոստին, Հյուսիսային Ռեյն-Վեսթֆալիա վարչական տարածքի ՆԳՆ ղեկավար Հերբերտ Ռոյլը հաստատել է, որ Մյունսթերում բեռնատարով մարդկանց բազմության մեջ մխրճված անձը Գերմանիայի քաղաքացի է և որ իսլամիստական համատեքստ դեռ չեն հայտնաբերել։
«Հանցագործը, որը ցերեկը ժամը 3-ի սահմաններում մեքենայով միտումնավոր մխրճվել է մարդկանց ամբոխի մեջ Գերմանիայի քաղաքացի էր, այլ ոչ թե փախստական, ինչպես հերթական անգամ կարծում էին բոլորը», — հայտարարել է Ռոյլը։ Նրա հայտարարությունը հեռարձակում էր n-tv հեռուստաալիքը։ Միևնույն ժամանակ նախարարը նշել է, որ հետաքննությունը դեռ նախնական փուլում է։
Գերմանիայի կանցլեր Անգելա Մերկելը հայտնել է, որ խորապես ցնցված է Մյունսթերում տեղի ունեցած «սարսափելի միջադեպից»։ Նա ավելացրել է, որ միջադեպի վերաբերյալ ցանկացած մանրամասն իմանալու համար կապ է պահպանում փոխկանցլեր Օլաֆ Շոլցի, Գերմանիայի ԱԳՆ ղեկավար Հորսթ Զեեհոֆերի, ինչպես նաև Հյուսիսային Ռեյն-Վեսթֆալիայի իշխանությունների հետ։ Այն մասին, որ հետաքննությանը հետևում են Բեռլինից, ավելի վաղ հայտնել էր նաև արտգործնախարար Զեեհոֆերը։
Մերկելը խոստացել է անել «հնարավոր ամեն բան» միջադեպի հետաքննության համար, ինչպես նաև ողբերգության հետևանքով տուժածներին և զոհերի բարեկամներին աջակցելու համար։ Նա իր երախտագիտությունն է հայտնել դեպքի վայրում աշխատող իրավապահ մարմինների աշխատակիցներին։
Գերմանիայում հոգեկան շեղումներ ունեցող մարդկան նախաձեռնությամբ նման ողբերգություններ արդեն եղել են. 2015 թվականի մարտի 24-ին գերմանացի օդաչու Անդրեաս Լյուբիցը, որը խորը դեպրեսիայի մեջ էր, փակվել էր Germanwings ինքնաթիռի սրահում, անջատել ավտոպիլոտը և ավիավթարի մեղավոր դարձել։ Այդ ժամանակ 150 մարդ էր զոհվել։
Գերմանիայի Մյունսթեր քաղաքի պատմական կենտրոնում` Հյուսիսային Ռեյն-Վեսթֆալիայում գտնվող Kiepenkerl բացօթյա սրճարանի այցելուներին բեռնատարով վրաերթի ենթարկելու հետևանքով 3 մարդ է մահացել, 20-ը վնասվածքներ են ստացել։
