ԵՐԵՎԱՆ, 5 ապրիլի — Sputnik. Լիոնի մոտակայքում գտնվող Սատոնե– Կամ քաղաքում տիպիկ ֆրանսիական դրամա է ծավալվել։ BFMTV հեռուստաալիքը փոխանցում է, որ ֆրանսիացի սիրեկանը հայտնվել է սիրային հնգանկյունի կենտրոնում։
Ֆրանսիացին հիվանդանոցում է հայտնվել այն բանից հետո, երբ չորս աղջիկ իմացել են միմյանց գոյության մասին ու որոշել են պատժել խորամանկ հրապուրողին։
Հաղորդագրության համաձայն` հարձակումը տեղի է ունեցել ֆրանսիական Սատոնե- Կամ քաղաքում։ Դեռ հայտնի չէ` ինչպես են կանայք իմացել միմյանց մասին, սակայն մի օր նրանք չորսով եկել են 27–ամյա տղամարդու տուն, որպեսզի պատժեն նրան անհավատարիմ լինելու համար։ Աղջիկներն այնքան են ծեծել երիտասարդին, մինչև ժանդարմները հասել են դեպքի վայր։
Միջադեպի հետևանքով տուժածը երեք օր կորցրել էր աշխատունակությունը։ Բացի այդ, հարձակվողները, տունը լքելիս, իրենց հետ են վերցրել հեռախոսն ու հարաբերությունների ընթացքում արված նվերները։
Դոն Ժուանի դեմ համատեղ «պատժիչ արշավ» կազմակերպած կանանց ձերբակալել են երեքշաբթի։ Նրանց մեղադրում են բռնության ու կողոպուտի մեջ։ Դատը տեղի է ունենալու սեպտեմբերի 17–ին։
