ԵՐԵՎԱՆ, 3 ապրիլի — Sputnik. Խորհրդարանը կվերահսկի շարժական տեսախցիկներով արձանագրվող խախտումների նկատմամբ կիրառվող տուգանքների գործընթացը: Այս մասին այսօր ԱԺ պետաիրավական հարցերով մշտական հանձնաժողովի նիստում հայտարարեց հանձնաժողովի նախագահ Գևորգ Կոստանյանը:
«Մենք մեր ընդդիմադիր գործընկերների հետ այս հարցով բուռն քննարկում ենք ունեցել: Ուսումնասիրել ենք տեսաձայնագրման, տեսանկարահանման միջոցով ճանապարհային երթևեկության խախտումների օրենսդրության ու պրակտիկ կիրառման հարցերը»,- ասաց Կոստանյանը` հավելելով, որ պատգամավորներին մտահոգել է տուգանքների կիրառման խնդիրը:
Կոստանյանը կարևորեց, որ խախտումների արձանագրումը պետք է ունենա ոչ թե պատժիչ, այլ կանխարգելիչ նշանակություն: Բացի այդ կարևորէ, որ շարժական տեսախցիկների աշխատանքը չխախտի քաղաքացիների անձնական կյանքի անձեռնմխելիության իրավունքը:
Կոստանյանը նշեց, որ հարցը քննարկվել է ընդդիմադիր «Ելքի» պատգամավորների հետ, և որոշում է կայացվել խորհրդարանական վերահսկողության կենտրոնում պահել ներկայացված խնդիրը:
