ԵՐԵՎԱՆ, 2 ապրիլի — Sputnik. Հյուսիսային պողոտայի սննդի կետում տեղի ունեցած պայթյունից տուժած երեխաների վիճակը կայուն է: Այս մասին քիչ առաջ լրագրողներին հայտնեց Երևանի Գրիգոր Լուսավորիչ բժշկական կենտրոն այցելած ԱԺ նախագահ, մանկական վիրաբույժ Արա Բաբլոյանը:
8 տարեկան Ռուբինա Մարկոսյանի վիճակի մասին հարցին Արա Բաբլոյանը պատասխանեց, որ երեխան ստացել է ազդրի վերին երրորդական հատվածի խորը վնասվածք:
«Վնասվածքը մինչև ոսկոր է հասել, բայց բարեբախտաբար ոսկորը չի վնասել»,- ասաց Բաբլոյանը՝ հավելելով, որ երեխայի վիրահատությունն ընթացել է նորմալ, բժիշկներն արել են անհրաժեշտ ամեն բան արյունահոսությունը դադարեցնելու և հյուսվածքները վերականգնելու համար:
Գրիգոր Լուսավորիչ բժշկական կենտրոնի տնօրեն Արա Մինասյանը նույնպես նշեց, որ բոլոր վիրավորները բեկորային վնասվածքներ են ստացել:
«Հիմնականում այնպիսի վնասվածքներ էին, որ պետք է կար դրվեր՝ հյուսվածքները վերականգնելու համար»,- ասաց նա:
Արա Մինասյանը նշեց, որ այսօր տուժածները կմնան հսկողության տակ, դուրս գրվողներ առայժմ չեն լինի՝ անկախ վնասվածքի աստիճանից:
Հիշեցնենք, որ ապրիլի 2-ին, ժամը 20:44-ին ահազանգ է ստացվել, որ Երևան քաղաքի Հյուսիսային պողոտայի թիվ 5 հասցեում գտնվող Բուրգեր Քինգ արագ սննդի կետում տեղի է ունեցել պայթյուն, կան տուժածներ. անհրաժեշտ է փրկարարների օգնությունը: Դեպքի վայր են մեկնել չորս մարտական հաշվարկ, Ճգնաժամային կառավարման ազգային կենտրոնի արտակարգ իրավիճակների արձագանքման և օպերատիվ խմբերը:
Նախնական տվյալներով խոհանոցում պայթել է թթվածնի բալոն, կա 8 տուժած՝ Ռուդոլֆ Մարկոսյան (6 տարեկան), Ռուբինա Մարկոսյան (8 տարեկան), Զարուհի Մելիքյան (19 տարեկան), Էրիկ Աշուղյան (24 տարեկան, ԻԻՀ քաղաքացի), Ալյոնա Ագապովա (15 տարեկան, ՌԴ քաղաքացի), Լիզա Աբրահամովա (15 տարեկան, ՌԴ քաղաքացի), Յարոսլավ Լյուբենկո (15 տարեկան, ՌԴ քաղաքացի), Զեյնա Հուսեինի (24 տարեկան, ԻԻՀ քաղաքացի), ովքեր տեղափոխվել են Սուրբ Գրիգոր Լուսավորիչ ԲԿ:
