ԵՐԵՎԱՆ, 2 ապրիլի — Sputnik. ՀՀ արտակարգ իրավիճակների նախարար Դավիթ Տոնոյանն այս պահին Բուրգեր Քինգ արագ սննդի հաստատությունում է, որտեղ ժամեր առաջ պայթյուն է որոտացել: Նախարարը տեղում ծանոթացել է կատարվածին, շրջեել արագ սննդի կետի ներսում, ուսումնասիրել դեպք վայրը:
Նախարարը լրագրողներին հայտնել է, որ նախնական վարկածի համաձայն՝ պայթյունի պատճառը գարեջրի ճնշումն ապահովող թթվածնի բալոնն է:
Նա դժվարացավ այլ մանրամասներ ասել՝ նշելով, որ քննիչները և տեխնիկական անվտանգության փորձագետներն աշխատում են պայթյունի հստակ պատճառները պարզելու համար:
Տոնոյանի խոսքով՝ ԱԻՆ-ը մինչև պայթյունը որևէ գործառույթ չի ունեցել՝ հսկելու բալոնների անվտանգությունը: Ըստ նրա՝ պատճառները կարող են տարբեր լինել՝ ճնշման տատանում, մեծ ճնշումը բալոնում:
Նախարարը հավաստիացրել է, որ հրդեհատեխնիկական անվտանգության խնդիր այդ դեպքի առնչությամբ չկա, սակայն ՌԴ Կեմերովոյի հրդեհի դեպքից հետո բոլոր տեղերում խստացված ստուգումներ են անցկացվում:
Հիշեցնենք, որ ապրիլի 2-ին, ժամը 20:44-ին ահազանգ է ստացվել, որ Երևան քաղաքի Հյուսիսային պողոտայի թիվ 5 հասցեում գտնվող Բուրգեր Քինգ արագ սննդի կետում տեղի է ունեցել պայթյուն, կան տուժածներ. անհրաժեշտ է փրկարարների օգնությունը: Դեպքի վայր են մեկնել չորս մարտական հաշվարկ, Ճգնաժամային կառավարման ազգային կենտրոնի արտակարգ իրավիճակների արձագանքման և օպերատիվ խմբերը:
Նախնական տվյալներով խոհանոցում պայթել է թթվածնի բալոն, կա 8 տուժած՝ Ռուդոլֆ Մարկոսյան (6 տարեկան), Ռուբինա Մարկոսյան (8 տարեկան), Զարուհի Մելիքյան (19 տարեկան), Էրիկ Աշուղյան (24 տարեկան, ԻԻՀ քաղաքացի), Ալյոնա Ագապովա (15 տարեկան, ՌԴ քաղաքացի), Լիզա Աբրահամովա (15 տարեկան, ՌԴ քաղաքացի), Յարոսլավ Լյուբենկո (15 տարեկան, ՌԴ քաղաքացի), Զեյնա Հուսեինի (24 տարեկան, ԻԻՀ քաղաքացի), ովքեր տեղափոխվել են Սուրբ Գրիգոր Լուսավորիչ ԲԿ:
