ԵՐԵՎԱՆ, 2 ապրիլի — Sputnik. ԱԻՆ արձագանքնման խմբի պետ, փոխգնդապետ Տիգրան Կոստանյանը լրագրողների հետ զրույցի ժամանակ տեղեկացրել է, որ հաստատությունում պայթել է գարեջրի ճնշումն ապահովող բալոնը:
Ըստ նրա՝ տուժածներից մեկը հաստատության մենեջերն է՝ 19-ամյա Զարուհի Մելքոնյանը, ով այդ պահին եղել է բալոնի կողքին: Եվս մեկ տուժածի՝ 8-ամյա Ռուբինա Մարկոսյանի վիճակը ծայրահեղ ծանր է, նրան այս պահին վիրահատում են Գրիգոր Լուսավորիչ բժշկական կենտրոնում: Ի դեպ, տուժածների մեջ Իրանի երկու և Ռուսաստանի երեք քաղաքացիներ կան: Բոլոր մյուս տուժածների վիճակը գնահատվում է կայուն ծանր:
Թե ինչը կարող էր պայթյունի պատճառ լինել, առայժմ ԱԻՆ-ի աշխատակիցը դժվարացավ պատասխանել՝ ասելով, որ ըստ նախնական վարկածի՝ բալոնը կարող էր պայթել այնտեղ յուղի ներթափանցման հետևանքով: Ամեն դեպքում, ինչպես նա նշում է, սովորաբար նման բալոնները պայթում են լիցքավորման ժամանակ:
Թե ինչը կարող էր պայթյոն առաջացնել, հստակ հնարավոր կլինի պատասխանել փորձագետների կատարած հետազոտությունից հետո: Այս պահին մասնագետներն ուսումնասիրոմ են դեպքի վայրը և փորձում ճշտել պայթյունի իրական պատճառը:
ԱԻՆ-ի պաշտոնական կայքը ճշգրտում է, որ միջադեպի հետևանքով կա 8 տուժած՝ Ռուդոլֆ Մարկոսյան (6 տարեկան), Ռուբինա Մարկոսյան (8 տարեկան), Զարուհի Մելիքյան (19 տարեկան), Էրիկ Աշուղյան (24 տարեկան, ԻԻՀ քաղաքացի), Ալյոնա Ագապովա (15 տարեկան, ՌԴ քաղաքացի), Լիզա Աբրահամովա (15 տարեկան, ՌԴ քաղաքացի), Յարոսլավ Լյուբենկո (15 տարեկան, ՌԴ քաղաքացի), Զեյնա Հուսեինի (24 տարեկան, ԻԻՀ քաղաքացի):
