ԵՐԵՎԱՆ, 1 ապրիլի — Sputnik. Թուրքիայի և Իսրայելի առաջնորդները շարունակում են փոխանակվել «հաճոյախոսություններով», որի պատճառը պաղեստինցիների բախումներն են իսրայելական զորքերի և ոստիկանության հետ։ Ընդհարումների ընթացքում մահացել է 10-ից ավելի պաղեստինցի, վիրավորվել են 1,5 հազար արաբներ։
Թուրքիայի նախագահը դատապարտել էր Գազայի սահմանին ահաբեկիչների սպանությունը, հայտարարելով, որ նա վճռականորեն դատապարտում է «հրեական պետությանն իր անմարդկային հարձակման համար։ Իսրայելը շարունակում է կեղեքել մեր պաղեստինցի քույրերին ու եղբայրներին՝ «սեղմելով» Պաղեստինի հողերը»։
Իսրայելի վարչապետ Բինյամին Նեթանյահուի պատասխանը չի ուշացել։ Նրա խոսքով՝ աշխարհի ամենաբարոյական բանակը (Իսրայելի պաշտպանության բանակը, խմբ․)չի լսի նրանց խրատները, ովքեր տարիներ շարունակ ռմբակոծում են քաղաքացիական բնակչությանը։
Դա դուր չի եկել Թուրքիայի դյուրագրգիռ նախագահին։ Էրդողանը հայտարարել է, որ Նեթանյահուն շատ տարօրինակ և անհեթեթ հայտարարություններ է անում։
«Այն ժամանակ, երբ Թուրքիան վճռական պայքար է մղում ահաբեկչության հետ, Իսրայելը վարում է ահաբեկչական քաղաքականություն, այլ ոչ թե պայքարում է հանցավորության դեմ», — մեջբերել է Էրդողանի խոսքերը «Անադոլու» գործակալությունը։
Թուրքիայի առաջնորդը կոչ է արել Իսրայելի վարչապետին հրաժարվել պաղեստինցիների վրա ճնշում գործադրելու և Անկարային քննադատելու քաղաքականությունից։
«Նեթանյահուն պետք է անկեղծ լինի և դադարի քննադատել Թուրքիային», — ասել է նա։
Անցած շաբաթ օրն Իսրայելի բանակի մամուլի ծառայությունը հանդես էր եկել պնդմամբ, որ սպանվածների շարքում պաղեստինական զինված կազմակերպությունների առնվազն 10 գրոհային կան։ Նրա տվյալներով՝ ութ սպանվածները ՀԱՄԱՍ արմատական շարժման և դրա մարտական թևերի ակտիվիստներ են, մյուս երկուսը պատկանել են «Իսլամական ջիհադ» և «Ալ Աքսայի նահատակների ջոկատներ» խմբավորումներին։
