ԵՐԵՎԱՆ, 29 մարտի — Sputnik. Հայկական բանակի սպառազինությունը սկսել է համալրվել տեղական արտադրության շրջադիտակներով։ Հայկական ընկերությունների ստեղծած շրջադիտակները թույլ են տալիս խրամատից հետևել և՛ ցերեկային, և՛ գիշերային ժամերին։
Նոր սարքավորումները ներկայացվել են այսօր Երևանում կայացած ArmHiTec 2018 պաշտպանական տեխնոլոգիաների ցուցահանդեսին։ Ստեղծվել են նաև գիշերային ռեժիմով աշխատող շրջադիտակներ։ Այս մասին Sputnik Արմենիայի հետ զրույցում ասաց «Օրբիտ Ա» ընկերության օպտիկայի բաժնի պետ Արամայիս Բաղդասարյանը։
Ցերեկն այս սարքի օկուլյարը պատվում է պաշտպանիչ մասով (որպեսզի փոխարկիչ լամպը ցերեկային լույսից չտուժի), բայց հետևելու համար փոքր անցք է մնում։Իսկ գիշերը պաշտպանիչ մասը հանում են, և արդեն կարելի է շրջադիտակը լիարժեքորեն օգտագործել:
Գիշերային սարքերը դեռ փորձարկումներ են անցնում, իսկ սովորական ցերեկայիններն արդեն կիրառվում են զինված ուժերում։ Փորձարկելու արդյունքում կատարելագործման առաջարկներ են եղել։ Սարքերը ոչ միայն արդյունավետ են, այլ նաև մատչելի։
Սարքի կառուցվածքը վաղուց է հայտնի, սակայն այն նախկինի պես արդիական է մնում։
«Այս սարքի միջոցով շատ ավելի անվտանգ է դառնում խրամատից հետևել, քանի որ այնտեղից ոչ ոք չի երևում», — նշում է «Լազերային տեխնիկա» ՓԲԸ-ի (ձեռնարկությունն ամբողջությամբ պատկանում է Պաշտպանության նախարարությանը) գլխավոր կոնստրուկտոր Վարդան Պահլավունին։
Կարելի է մեծ շառավղով հետևել, քանի որ շրջադիտակը հեռադիտակի պես կարող է 10-15 անգամ մոտեցնել պատկերը։
Բնականաբար, երկու ընկերությունները միմյանց համար հակառակորդներ չեն։ Նրանց ընդհանուր թշնամին ժամանակի կորուստն է։ Նրանց գլխավոր հաղթանակը՝ առաջնագծի հնարավորինս արագ զինումն ու յուրաքանչյուր փրկված կյանքը։
