ԵՐԵՎԱՆ, 28 մարտի — Sputnik. Facebook սոցցանցի 50 մլն օգտատերների անձնական տվյալները գողանալու թեման այսօր հրավիրված ասուլիսի ընթացքում մեկնաբանեց տեղեկատվական անվտանգության հարցերի փորձագետ Սամվել Մարտիրոսյանը։
Հիշեցնենք, որ բրիտանական Cambridge Analytica ընկերությունը թեստեր է գործարկել սոցցանցերի օգտատերերի համար, և ամենաակտիվ օգտատերերը «բռնվել» են կամ, ինչպես ասում են, ծուղակն են ընկել։ Վերջին տարիներին Facebook-ում արդիական են ինտելեկտը ստուգելու, կինոաստղի կամ կենդանու հետ նմանության թեստերը։ Օգտատերերը հաճույքով պարզում են իրենց ապագա երեխայի սեռը` չկասկածելով, որ զվարճանք թվացող զբաղմունքն ամենաիսկական «ծուղակ» է, և ինչ-որ մեկը նպատակաուղղված փորձում է անձնական տվյալների հասանելիություն ստանալ։
The Guardian և The New York Times հեղինակավոր պարբերականները պարզել են, որ բոլոր տվյալներն օգտագործվել են Դոնալդ Թրամփի նախընտրական քարոզարշավին աջակցելու համար։
«Սկանդալն առաջացել է մարտի կեսերին, պատճառը եղել է այն, որ Facebook-ը Cambridge Analytica ընկերությանը թույլ է տվել մոտ 50 մլն օգտատերի անձնական տվյալներ հավաքել, որոնք թույլ են տալիս օգտագործել քաղաքական նպատակներով ուղեղները լվանալու, քարոզչության համար», — ասաց Մարտիրոսյանը։
Այդ ամենը, նրա խոսքով, հանգեցրեց նրան, որ հանրահայտ սոցցանցի վարկանիշն անկում ապրեց, շատերը սկսեցին ջնջել իրենց էջերը։ Հենց այդ ժամանակ առաջացավ #DeleteFacebook սոցիալական հեշթեգը։
Սոցցանցի ստեղծողների համար, ըստ Մարտիրոսյանի, մեծ հարված դարձավ այն, որ ամերիկացի հայտնի գործարար Իլոն Մասկը Facebook-ում ջնջեց Tesla-ի և SpaceX-ի էջերը։
Տղամարդկանց համար նախատեսված լեգենդար Playboy ամսագրի ղեկավարությունը նույնպես որոշել է ապաակտիվացնել պարբերականի պաշտոնական էջը Facebook-ում։ Շարժառիթ է դարձել օգտատերերի անձնական տվյալների արտահոսքի հետ կապված սկանդալը, ինչի մասին Playboy-ցիներն անձամբ հայտնել են այսօր տարածած հաղորդագրության մեջ։
Եթե փորձենք բացել հայտնի ամսագրի էջը, կտեսնենք այս գրառումը. «Ցավոք, այս կոնտենտն այժմ հասանելի չէ»։
Playboy-ն իր որոշումը բացատրել է այսպես` սոցցանցի խիստ կանոնների պատճառով ընկերության համար դժվար է իր արժեքներն արտահայտել Facebook-ում։
