ԵՐԵՎԱՆ, 2 փետրվարի — Sputnik. Instagram-ը ավելի ու ավելի մեծ պահանջարկ է վայելում հայ օգտատերերի շրջանում։ Վերջին տվյալներով՝ Instagram-ի հայ օգտատերերի քանակն աճել է՝ հասելով 500 հազարի: Sputnik Արմենիայի հետ զրույցում այս մասին հայտնել է տեղեկատվական անվտանգության փորձագետ Սամվել Մարտիրոսյանը։
Ըստ նրա` Facebook-ի օգտատերերի մոտ կեսն օգտվում է նաև Instagram-ից, այդ ցանցի օգտատեր է, մինչդեռ Facebook-ի օգտատերերի ցուցանիշները վերջին տարիներին չեն աճում։
«Կարելի է ասել, որ այժմ շատերն են գրանցվում Instagram-ում, այդ առումով սոցցանցում աշխուժություն է նկատվում: Փոխարենը Facebook-ն այլևս գերիշխող սոցցանց չէ, քանի որ այդ կայքի օգտատեր է բնակչության մոտ մեկ երրորդը (1,1 մլն օգտատեր)», — նշեց Մարտիրոսյանը։
Մեդիափորձագետը նաև հավելեց, որ Հայաստանում միմյանց հետ մրցակցող մի քանի սոցցանց կա: Այդ առումով մեր երկիրը տարբերվում է մյուսներից, որտեղ Facebook-ը առաջատար դիրք է զբաղեցնում։
Իսկ հայերի «ամենաչսիրած» կայքը Twitter-ն է, որտեղ հայ օգտատերերն ընդհանրապես աշխույժ չեն: Պատճառն այն է, որ սոցցանցը իր «խառնվածքով» հոգեհարազատ չէ մեզ:
Մեդիափորձագետը նաև ավելացրեց, որ մինչև 2017 թվականի կեսը Հայաստանում «Одноклассники» կայքն առաջատար տեղ էր զբաղեցնում նախընտրելի սոցցանցերի ցուցակում, սակայն վերջին տարիներին այդ ռեսուրսի օգտագործման ծավալները զգալիորեն նվազել են, իսկ Facebook-ը նրանից առաջ է անցել իր ցուցանիշներով։
«Facebook-ում օրական 700 հազար ակտիվ օգտատեր է լինում, «Одноклассники»-ում` մինչև 600 հազար։ ВК-ն Հայաստանում ամենաշատ հաճախում ունեցող սոցցանցն է։ Սակայն այդ կայքում վիճակագրությանը հետևելը շատ դժվար է, քանի որ շատերն այնտեղ մուտք են գործում երաժշտություն լսելու և տեսանյութեր դիտելու համար», — ասաց Sputnik Արմենիայի զրուցակիցը։ Այդ հարթակը, Մարտիրոսյանի հավաստիացմամբ, երաժշտական փլեյերի դեր է կատարում։
Ինչ վերաբերում է սոցցացներում առավել ակտիվ օգտատերերի տարիքային խմբին, ապա նրանք մինչև 35 տարեկան քաղաքացիներն են։
Մարտիրոսյանը նաև պատմեց, թե ինչով են տարբերվում սոցցանցերի օգտատերերը Հայաստանում, Վրաստանում և Ադրբեջանում։
«Վրացիներն ավելի շատ Facebook-ից են օգտվում։ Ադրբեջանում ավելի տարածված են Instagram-ն ու Facebook-ը։ Սակայն այնտեղ բավական տարօրինակ գենդերային բաշխվածություն կա՝ տղամարդ օգտատերերի թիվը կրկնակի ավել է», — ընդգծեց մեդիափորձագետը։
Մարտիրոսյանի կանխատեսմամբ՝ առաջիկայում հայ օգտատերերի աճ կգրանցվի YouTube հոսթինգում, կշատանա նաև վիդեո բլոգերների քանակը։
Համացանցում անվտանգության մասին խոսելիս` Մարտիրոսյանն ասաց, որ վերջին տարիներին հայ օգտատերերն ավելի գրագետ են սկսել օգտվել սոցցանցերից, նրանց էջերն ավելի հազվադեպ են կոտրում, թեև օգտատերերը ավելի շատ իրենց սխալների վրա են սովորում, ինչը լավագույն տարբերակը չէ։
