ԵՐԵՎԱՆ, 26 մարտի — Sputnik. Ժնևում երկարատև դատավարությունից հետո Հայոց ցեղասպանության զոհերի հիշատակին նվիրված հուշարձան կհայտնվի, հայտնում է Bluewin.ch շվեյցարական պարբերականը։
Հուշարձանի նախաձեռնողները ստիպված էին մի քանի տարի շարունակ պայքարել արձանի համար։ Հուշարձանի նախագիծը քաղաքային խորհուրդը հաստատել էր 2011 թվականին։ Մրցույթի հաղթող էր ճանաչվել ֆրանսիահայ ճարտարապետ Մելիք Օհանյանի նախագիծը` 10-մետրանոց 9 լապտերասյուներ, որոնցից յուրաքանչյուրի լապտերն արցունքի տեսք ունի։
Սկզբում այն ուզում էին բացել «Բաստիոն Սենտ Անտուան» հնագիտական իրերի այգում, բայց այնտեղ բավարար տեղ չգտնվեց, հետո որոշեցին, որ հարմար վայր է «Արիանա» ապակու և խեցեղենի թանգարանը` ՄԱԿ-ի ազգերի պալատի մերձակայքում, սակայն այդ ժամանակ Շվեյցարիայի իշխանությունը բավարարեց Անկարայի գործընկերների դիմումն այն մասին, որ ՄԱԿ-ի շենքի տարածքը քաղաքական առումով չեզոք պետք է մնա։
«Եթե այդպես է, ուրեմն հուշարձանը չի կարելի կանգնեցնել քաղաքի նաև այլ վայրերում»,- պնդեց փաստաբան և նախկին պատգամավոր Իվ Նիդեգերը։ Նշենք, որ Շվեյցարիայի իշխանությունից նա նույն եռանդով պաշտպանում էր Թուրքիայի աշխատավորական կուսակցության առաջնորդ Դողու Փերինչեքին, որը հանդես է եկել Հայոց ցեղասպանության հրապարակային մերժումով։
Վերջապես հուշարձանի համար ընտրեցին Թրեմբլե պուրակը, բայց հուշարձանի հակառակորդները չհանդարտվեցին։ Նիդեգերի ջանքերի շնորհիվ պուրակի հարևանությամբ գտնվող տների որոշ բնակիչներ հայտարարեցին, որ հասարակական այգին քաղաքականության տեղ չէ, իսկ հուշարձանն էլ խանգարում է նրանց։
Սակայն հունվարին դատարանը մերժեց նրանց հայցը, և մեկնարկեցին հուշարձանի տեղադրման նախապատրաստական աշխատանքները։ Ինչպես հայտնել է նախագծի համակարգող Ստեֆան Քրիստենսենը, հուշարձանը նախատեսվում է բացել ապրիլի 13-ին։
