ԵՐԵՎԱՆ, 25 մարտի — Sputnik, Անի Լիպարիտյան․ Մոսկվացի զբոսաշրջիկ Դմիտրի Կրասավինը չորս օրով էր Հայաստան եկել։ Այս ընթացում նա հասցրել է տեսնել հիմնական զբոսաշրջային տեսարժան վայրերը, նաև հասկանալ՝ ինչու են հայերն այդքան «Նիվա» մակնիշի մեքենան սիրում։
Դմիտրին սիրում է ճանապարհորդել և իր ուղևորությունների ընթացքում հաճախ է մեքենա վարձակալում, որպերզի հանգիստ շրջի այս կամ այն երկրի քաղաքներով։
«Հայաստանում մեկ խնդիր կա՝ փոքր քաղաքների դժվարանցանելի ճանապարհները։ Հիմա հասկացա՝ ինչու այստեղ այդքան շատ «Նիվա» կա։ Հատկապես՝ սպիտակ», — ասում է մոսկվացին։
Ռուս զբոսաշրջիկը նշեց, որ վաղուց էր պատրաստվում Հայաստան այցելել, հատկապես, որ Մոսկվայում նա ունի բազմաթիվ հայ ընկերներ, որոնք միշտ հետաքրքիր բաներ են պատմում հայրենիքի մասին։
«Քանի որ գրասենյակում եմ աշխատում, միշտ բոլոր հնարավոր տոներն օգտագործում եմ ճանապարհորդելու համար։ Մարտի 8-ի առիթով չորս ազատ օր ունեինք, դրանք Հայաստանում անցկացրի», — ասաց Sputnik Արմենիայի զրուցակիցը։
Դմիտրին գնահատում է նոր մարդկանց հետ ծանոթություններն ու դա իր ուղևորությունների լավագույն պահերից է համարում։ Մեր մոսկվացի հյուրը պատմեց, որ ճանապարհին հանդիպել է հետաքրքիր մարդկանց, որոնց հետ կարելի է ամեն ինչի մասին խոսել։
«Ես բուսակեր եմ, իսկ հայկական խոհանոցն 90%-ով մսով ուտեստներից է բաղկացած։ Այնպես որ այդքան էլ մեծ ընտրություն չունեի։ Բայց դա խնդիր չէ։ Թարմ հաց, տնական պանիր, բանջարեղեն ու գինի, էլ ի՞նչ է պետք։ Ինձ համար ամենակարևորը թարմ մթերքն է։ Հայաստանում այն շատ համեղ է։ Այնքան եմ տնական պանիր կերել, նաև տարբեր խոտերով ուտեստներ ունեք, շատ ախորժելի են։ Դե իհարկե, սմբուկով պատրաստած ամենատարբեր ուտեստները ևս շատ լավն են», — ասաց Դմիտրին։
Դմիտրիին ամենաշատեղը բնությունն էր տպավորել։ Ռուսաստանցին եղել է Հայաստանի տարբեր վայրերում ու իսկապես վայելել դրա գեղեցկությունը։
Դմիտրիին հետաքրքրեց նաև երևանյան մետրոն։ Սակայն նա չգիտեր, որ առանց հատուկ թույլտվության այն չի կարելի նկարահանել։ Այդ պատճառով հաջողվեց միայն մի քանի կադր անել: Նա հասցրել է շրջել ամբողջ Երևանում։ Ընկերոջ հետ բարձրացել է «Կասկադ»՝ Արարատով հիանալու, հասցրել է դերասան Ֆրունզիկ Մկրտչյանին պատկերող գրաֆիտի գտնել, նաև զբոսնել Կոնդում։
