ԵՐԵՎԱՆ, 23 մարտի — Sputnik. Վիշիում ապրիլի 29-ին կբացվի ժամանակակից ֆրանսիական գեղանկարչության դասական Գառզուի ցուցահանդեսը։ Ցուցահանդեսի նախաշեմին La Montagne պարբերականը զրուցել է նկարիչի որդու` Ժան-Մարի Գառզուի հետ։
Գառզուն ծնվել է Հալեպում՝ հին հայկական ընտանիքում 1907թ.-ին։ 1918թ.-ին նրա ընտանիքը տեղափոխվել է Եգիպտոս, այնուհետև Ֆրանսիա։ 17-ամյա Գառնիկ Զուլումյանը (նկարչի իսկական անունը) Փարիզում սովորելու կրթաթոշակ է ստացել։ Նա ցանկացել է նկարիչ դառնալ, բայց նրանից պահանջել են ավելի լուրջ բանով զբաղվել։ Նա էլ ճարտարապետություն է սովորել։
Նա նկարել է ինչ ասես և ամեն տեղ` կինոյի համար պաստառներ, թերթերի համար ծաղրանկարներ։ 1933թ.-ին նա Հիտլերին որպես Ձմեռ պապ է պատկերել` նվերների փոխարեն գնդացիրներով բեռնված։
Նկարիչը հայտնի է դարձել 1940-ականների վերջին։ Այդ ժամանակ նա հաստատվել է Փարիզի հայտնի Մոնպառնասում գտնվող արվեստանոցում։
«Գառնիկի ծնողները չեն մահացել կեղեքումների սարսափելի տարիների ժամանակ, բայց վաղ են հեռացել կյանքից։ Նա շատ ծանր է տարել նրանց մահը։ Բայց նա ինձ ասում էր, որ հոռետես չէ։ Իսկ շրջապատում նրան նույնիսկ հմայիչ էին համարում», — հիշում է որդին։
Չի կարելի չմտածել ճարտարապետության մասին` նայելով նրա նկարներին՝ նրբակերտ, հղկված գրաֆիկայի պատճառով, հավելում է Ժան-Մարին։ Նաև այն պատճառով, որ երևակայական աշխարհում նա երբեք չի կտրվում իրականությունից։
Գառզուն խիստ կապված է եղել առողջարանային Վիշիի հետ։ Ժան-Մարին պատմում է արդեն մանկության հիշողություններից։ 50-ական թթ.-ին, երբ նկարիչն արդեն հայտնի է եղել, ընտանիքի` Նանեի և որդու հետ այցելել է այս քաղաք։ Մայրն ու որդին զբոսնել են, բիլյարդ խաղացել, իսկ հայրը ժամերով նկարել է քաղաքային այգիներում։
