ԵՐԵՎԱՆ, 22 մարտի — Sputnik. Մարոկկոյի արքա Մուհամմեդ VI —ը և նրա կինը` արքայադուստր Լալա Սալման, ամուսնալուծվել են։ Այս մասին հաղորդում է ՌԻԱ Նովոստին` հղում անելով իսպանական Hola պարբերականին։
Լրագրողներին այդ տեղեկությունը հայտնել են թագավորական ընտանիքի հետ մտերիմ աղբյուրները։
Պարբերականի տվյալներով` 54-ամյա թագավորը և 39-ամյա արքայադուստրն ամուսնացել են 2002թ.-ի մարտի 21-ին, զույգը երկու երեխա ունի` 15-ամյա թագաժառանգ Մուլայ Հասանը և 11-ամյա արքայադուստր Լալա Հաջիջան։
Պարբերականը նաև նշում է, որ թագավորի և նրա կնոջ հարաբերությունները վատացել են անցած տարվա ապրիլին` Կուբա և Մայամի կատարած ուղևորությունից հետո։ Դրանից հետո Լալա Սալման երկար ժամանակ չէր մասնակցում հանրային միջոցառումներին։
Նշվում է, որ վերջին պաշտոնական միջոցառումը, որին ներկա է եղել արքայադուստրը, 2017թ.-ի հոկտեմբերին Մարաքեշում Yves Saint Laurent-ի թանգարանի բացումն էր։
