ԵՐԵՎԱՆ, 21 մարտի — Sputnik. Դեռ 2018թ. հունվարի 23-ին, ժամը 16:45-ի սահմաններում ենթադրյալ հանցագործություն կատարած անձը միկրոավտոբուսներից մեկում գրպանահատները ուղևորուհիներից մեկի պայուսակից գողացել էին նրա դրամապանակը, որի մեջ կանխիկ գումարից բացի նաև բանկային քարտ է եղել: Գրպանահատներն անմիջապես քայլեր են ձեռնարկել գողացված քարտում եղած գումարը կանխիկացնելու համար։ Եվ այդ ամենը տեսագրվել է բանկոմատի անվտանգության տեսախցիկներով։
Ինչպես տեղեկանում են ՀՀ քննչական կոմիտեի մամուլի ծառայությունից, քննվող քրեական գործով միջոցներ են ձեռնարկվում՝ պարզելու գողացված բանկային քարտով գումար կանխիկացրած անձանց ինքնությունը։
Նախաքննության ընթացքում ստացվել է բանկոմատի անվտանգության տեսախցիկների` տվյալ օրվա տեսագրությունը, ենթարկվել զննության: Տեսանյութի մեջ երևում է, թե ինչպես են մի տղամարդ և կին գողացված քարտով բանկոմատով գործարք կատարում:
Քրեական գործով բազմակողմանի, օբյեկտիվ և լրիվ քննությունն ապահովելու նպատակով միջոցներ են ձեռնարկվում՝ տեսանյութում պատկերված անձանց հայտնաբերելու և նրանց մոտ այլ քաղաքացու բանկային քարտի հայտնվելու հանգամանքները պարզելու ուղղությամբ։
Քննչական կոմիտեից խնդրում են տեսագրության մեջ երևացող անձանց ներկայանալ վարույթն իրականացնող մարմնին կամ ովքեր ճանաչում են նրանց, որևէ տեղեկություն ունեն նրանց ինքնության կամ գտնվելու վայրի մասին, հայտնեն ՀՀ քննչական կոմիտեի Երևան քաղաքի քննչական վարչության Շենգավիթ վարչական շրջանի քննչական բաժին:
Տեսանյութը ներկայացնում ենք ստորև։
