ԵՐԵՎԱՆ, 7 մարտի — Sputnik. Արթիկ քաղաքի բնակիչ Ա. Մ.-ն ահազանգել է ոստիկանության Արթիկի բաժին` հայտնելով, որ ոստիկանության աշխատակից ներկայացած Հ. Մ.-ն իր տան դռան փականի բռնակը կամաց իջեցրել է ներքև և փորձել բացել դուռը: Հատուկ քննչական ծառայությունից հայտնում են, որ այդ պահին արթնացած բնակարանատերերի աղմուկը լսելով` Հ. Մ.-ն դուռն արագ քաշել է դեպի իրեն, որի հետևանքով կոտրել է դռան փականի բռնակը և փախել:
Դրանից հետո Ա. Մ.-ի որդին Հ. Մ.-ին բռնել է շենքի բակում և ներկայացրել ոստիկանության աշխատակիցներին:
Դեպքի առթիվ նախապատրաստված նյութերով պարզվել է, որ Հ. Մ.-ն աշխատում է ՀՀ ոստիկանության Շիրակի մարզային վարչության Մուշի բաժնում՝ որպես ՊՊԾ դասակի ոստիկան:
Նյութերի համաձայն` 06.02.2018թ.-ին վերջինս Գյումրիից Արթիկ քաղաք է մեկնել ԲՄՎ մակնիշի ավտոմեքենայով, որի վրա փակցված են եղել մեկ այլ քաղաքացու անվամբ հաշվառված ավտոմեքենայի համարանիշեր:
Վերը նշված դեպքի առթիվ ՀՀ քննչական կոմիտեի Շիրակի մարզային քննչական վարչությունում հարուցվել է քրեական գործ:
Հաշվի առնելով, որ հիշյալ քրեական գործի նյութերում առկա են ՀՀ ոստիկանության պետական հատուկ ծառայություն իրականացնող պաշտոնատար անձի կողմից բնակարան ապօրինի մուտք գործելով գողության փորձ կատարելու առերևույթ հանցագործության հատկանիշներ, ուստի այն ըստ քննչական ենթակայության ընդունվել է ՀՀ հատուկ քննչական ծառայության քննիչի վարույթ` հետագա նախաքննությունը շարունակելու համար:
