ԵՐԵՎԱՆ, 21 մարտի — Sputnik. Ռուսաստանը Հայաստանին գազ է առաջարկում ամենամրցունակ սակագնով, չորեքշաբթի խորհրդարանական լսումների ժամանակ ասաց ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը։
Պատասխանելով «Ծառուկյան» խմբակցության քարտուղար Վահե Էնֆիաջյանի` 1000 կմ–ի դիմաց 60 դոլարով թուրքմենական գազի գնելու մասին հարցին Մանուկյանը պատասխանեց. «Այսօր եմ վերադարձել Թուրքմենստանից։ Թուրքմեն գործընկերների հետ գազի մատակարարման վերաբերյալ բանակցությունները շարունակվում են։ Սակայն այն սակագները, որոնք մեզ առաջարկում են դեռ մրցունակ չեն մեր ունեցածից։ Իսկ ինչ վերաբերում է 60 դոլարին, կխնդրեի նշեիք դրա աղբյուրը։ Քանի որ ես նման բան չեմ լսել» – հայտնեց նախարարը։
Ավելի վաղ էներգետիկայի փոխնախարար Հայկ Հարությունյանը հայտնել էր, որ Իրանը ևս Հայաստանին ավելի շահավետ գին չի առաջարկել գազի համար։
«Բանակցությունները դուք եք վարում։ Եվ եթե դուք նման թիվ չեք տեսել, նշանակում է, նման թիվ չկա», – ակնարկել է ԱԺ փոխխոսնակ Էդուարդ Շարմազանովը` դիմելով նախարարին։
Իսկ ինչ վերաբերում է դեպի Վրաստան թուրքմենական կամ իրանական գազի տարանցմանը, ապա հայկական կողմը պատրաստ է ճկունություն ցուցաբերել բանակցությունների ժամանակ և ձեռնտու պայմաններ առաջարկել։ Միևնույն ժամանակ, առկա գազատրանսպորտային համակարգն ընդլայնելու հարկ չի լինի։ Մատակարարումը կարելի է իրականացնել սվոփերով (օրինակ` գազը ստանալ Իրանի սահմանին և նույնքան տալ` վրացական սահմանին)։
Նկատենք, որ Իրան–Հայաստան գազատարի թողունակությունը տարեկան 2 մլրդ 200 մլն խմ է կազմում։ Այսօր այն լցվում է մոտ 20%–ով։
2016 թվականի ապրիլից Հայաստանը Ռուսաստանից գազ է ստանում 1 խմ-ի դիմաց 150 դոլարով (նախկին 165-ի փոխարեն)։ Այդ համաձայնագիրը երկարացվել էր 2017 թվականի աշնանը Ռուսաստանի վարչապետ Դմիտրի Մեդվեդևի երևանյան այցի և Կարեն Կարապետյանի հետ հանդիպման ժամանակ։
