ԵՐԵՎԱՆ, 26 հունվարի — Sputnik, Լաուրա Սարգսյան. Վրաստանը պաշտոնապես հրաժարվել է ռուսական գազից, 2018 թվականին երկրի կարիքները հոգալու է Ադրբեջանը, վրացի լրագրողների հետ զրույցում այսօր հայտնել է Վրաստանի էկոնոմիկայի և կայուն զարգացման փոխնախարար Գեորգի Չիկովանին։
Վրաստանի իշխանության ու ընդդիմության գազային մարտերը 2018–ի սկզբին նոր թափ ստացան։ Պատճառն այն է, որ «Գազպրոմը» որոշել էր փոխել գազի` դեպի Հայաստան իրականացվող տրանզիտի սկզբունքը. եթե նախկինում Վրաստանին բաժին էր հասնում փոխադրով գազի 10%–ը, ապա հիմա Վրաստանը գումարով է հատուցում ստանում։ Վրացի ընդդիմադիրները պնդում են, որ դրա պատճառով երկիրը մեծ կորուստներ ունի։
«Վրաստանն այս տարի ռուսական գազի կարիքը չունի, դրա համար էլ չի գնում այն։ Մեր կարիքները հոգում է Ադրբեջանից մատակարարվող գազը, որն ապահովում են «Շահ Դենիզ» ու SOCAR ընկերությունները», – ասել է Չիկովանին։
Ընդ որոմ` նախապես խոսվել է, որ վթարի ու լրացուցիչ ծախսերի դեպքում Վրաստանը կարող է Ռուսաստանից գազ գնել, ընդգծել է փոխնախարարը։
Հայաստանի պետական կառավարման ակադեմիայի տարածաշրջանային հետազոտությունների կենտրոնի գիտաշխատող Ջոնի Մելիքյանը նշում է, որ վրացական իշխանությունների դիրքորոշումը նպատակահարմար չէ։
«Ադրբեջանական գազը Թբիլիսիի վրա ավելի թանկ կնստի, քան ռուսականը։ Դա զարմանալի չէ, քանի որ Բաքուն այսօր խնդիրներ ունի բավարար չափով գազի արտարդրության հարցում։ SOCAR–ը գազ է գնում Ռուսաստանից, Թուրքմենստանից, Իրանից` հոգալով Ադրբեջանի, Վրաստանի ու Թուրքիայի կարիքները», – ասաց Մելիքյանը։
Նա համոզված է, որ ադրբեջանական գազի լրացուցիչ ծավալները Վրաստանի վրա կնստեն առնվազն 200 դոլար` մեկ խորանարդ մետրի դիմաց, ինչը մոտ 15 դոլարով գերազանցում է Ռուսաստանի առաջարկած գազի սակագինը, որը 185 դոլար է։
Հայաստանի համար նախատեսված ռուսական գազի այն 10%–ը, որը որպես տրանզիտի համար վճար Վրաստանին էր բաժին հասնում, Թբիլիսիի համար մեծ նշանակություն ուներ։ Դա թույլ էր տալիս վրացիներին ստեղծել նոր էներգետիկ կարողություններ, ջերմային կայաններ, որոնք գազ էին օգտագործում ու էներգիա արտադրում, իսկ Վրաստանը լրիվ կախվածության մեջ է ընկել իր խոշորագույն մատակարարից` Ադրբեջանից։
Նախատեսվում է, որ մինչ տարվա վերջ Ադրբեջանը Վրաստանին 2680 միլիարդ խորանարդ մետր գազ կվաճառի։
