ԵՐԵՎԱՆ, 19 մարտի — Sputnik, Արմենուհի Մխոյան. ՀՀ ԿԳ նախարարության Գյումրու «Շիրակի Մ. Նալբանդյանի անվան պետական համալսարան»-ի դասախոսներ Գագիկ Համբարյանի և Հովհաննես Խորիկյանի աշխատանքից ազատելու փաստը մեծ աղմուկ է բարձրացրել բուհի որոշ դասախոսների ու ուսանողների շրջանակներում: Այսօր ուսանողները բողոքում էին դասախոսներին աշխատանքից ազատելու` բուհի ռեկտորի որոշման դեմ: Նրանք ստորագրահավաք են նախաձեռնել այդ հրամանի դեմ` պահանջելով բեկանել մարտի 15-ի որոշումն ու վերականգնել դասախոսներին: Ուսանողները պահանջագիր են ներկայացրել բուհի վարչական մաս, նույն պահանջով բաց նամակ են ուղարկել նաև ՀՀ նախագահին:
Sputnik Արմենիայի թղթակցին Գագիկ Համբարյանն ասաց, որ դեռ 6 ամիս առաջ ռեկտորի «կամայականությունների» դեմ իրենց բողոքներից, բաց նամակից, դասադուլից ու հացադուլից հետո նմանատիպ հանգուցալուծում սպասում էին, բայց դա արվել է իրավունքների կոպիտ խախտումներով:
«Պարոն Մինասյանի անձի դեմ ուղղված մեր մեղադրանքները, չգիտես ինչու, վերագրվում են բուհին, և ռեկտորն իր անձը նույնացնելով համալսարանի հետ` հայտարարում է, թե մենք վարկաբեկում ենք բուհը: Այնինչ մենք ընդամենը բարձրաձայնել ենք ռեկտորի կամայականությունների մասին: Ըստ էթիկայի հանձնաժողովի` դա դիտվել է որպես հանցանք և անհարգալի վերաբերմունք այլոց նկատմամբ, այսինքն՝ ոչ ոք իրավունք չունի քննադատելու մեկ ուրիշի բացթողումները, դա դիտվում է որպես վիրավորանք: Որոշման մեջ կան նաև բազմաթիվ այլ անտրամաբանական և անիմաստ մեկնաբանություններ ևս»,-նշեց Գագիկ Համբարյանը` փաստելով, որ այս «հաշվեհարդարը» ռեկտորը տեսել է հատուկ ԱԺ ԿԳ հանձնաժողովի այցից ժամեր անց, և մարտի 24-ին համալսարանում ծրագրված խորհդի նիստից առաջ:
«Այսինքն` ռեկտորը մեզ գործից ազատելով` զրկեց խորհրդի նիստին մասնակցելու և դրանում խնդիրների և բուհում կատարվող անօրինականությունների մասին բարձրաձայնելու հնարավորությունից»,-նշեց Գագիկ Համբարյանը։
Նրա տեղեկացմամբ` բուհի ռեկտորի որոշումը կբողոքարկվի դատարանում։
«Եթե այս ապօրինի որոշումը չբեկանեն և մեզ չվերականգնեն մեր նախկին աշխատանքում, մենք կմտնենք դատարան և ոչ միայն: Խաղաքարերը չեմ ուզում հիմա ամբողջությամբ բացել»,-նշեց Գագիկ Համբարյանը:
Ռեկտորի կողմից մատնանշված որոշման մեջ նշված է ՝ «Էթիկայի հանձնաժողովի կարծիքով Խորիկյանի ու Համբարյանի վարքագիծը ստեղծված իրավիճակում իր բացասական հետևանքներով բուհի համար վնասակար է և խարխլում է բարոյահոգեբանական մթնոլորտը բուհում, արատավորում է հաստատության վարկանիշը, և, ի վերջո, տուժում են բուհի շահառուները: Ելնելով վերը նշվածից` հանձնաժողովը որոշեց, որ նշված դասախոսները խախտել են ՇՊՀ-ի գիտական խորհրդի կողմից 30.01.2017 նիստում հաստատված «Էթիկայի սկզբունքներով» սահմանված «Ազնվության», «ճշմարտացիության», «այլոց նկատմամբ հարգանքի և վստահության» սկզբունքների որոշակի կետերը»:
Սրան ի պատասխան` Շիրակի պետհամալսարանի ուսանողական խորհրդի նախագահ Արմեն Մելքոնյանը հայտարարություն էր տարածել, որում ասված է. «Խորապես համոզված եմ, որ նման գիտնականներին բուհից հեռացնելը չի բխում բուհի և ուսանողության շահերից: Գտնում եմ, որ դասախոսներ Խորիկյանն ու Համբարյանը պետք է վերադառնան իրենց աշխատանքին: Որպես ուսանողական խորհրդի նախագահ, բուհի գիտական խորհրդի ուսանողական կազմի ներկայացուցիչ և բուհի ապագայով մտահոգ մարդ` պատասխանատու կերպով հայտարարում եմ` համարժեք միջոցների եմ դիմելու դասախոսներին աշխատանքի վերադարձնելու և ուսանողների շահերի պաշտպանությունն իրականացնելու համար»:
Մարտի 19-ին դասախոսներին աշխատանքի վերադարձնելու, ինչպես նաև մարտի 24-ին կայանալիք գիտխորհրդի և հոգաբարձուների խորհրդի համատեղ ընդլայնված նիստի թափանցիկությունը, բողոքին մասնակցող ուսանողների հատուկ խմբի և Հովհաննես Խորիկյանի ու Գագիկ Համբարյանի ներկայությունն ապահովվելու, բուհի ֆինանսական վիճակի թափանցիկությունն ու հաշվետվությունը ներկայացնելու պահանջով դիմում-նամակին միացել են բուհի ուսանողների մի մասը:
Մինչ ուսանողների մի մասը դասադուլի է անում, մյուսները մասնակցում են բնականոն դասապրոցեսին:
