ԵՐԵՎԱՆ, 18 դեկտեմբերի — Sputnik. ՀՀ պաշտպանության և կրթության ու գիտության նախարարությունների հետ շուրջ 1 ամիս ընթացող քննարկումներից հետո «Հանուն գիտության զարգացման» նախաձեռնությունն այսօր դարձյալ դասադուլ է հայտարարել։ Նախաձեռնության անդամներից երկուսը ֆիզիկայի ֆակուլտետում հացադուլ են հայտարարել։
Այս մասին Sputnik Արմենիային ասաց «Հանուն գիտության զարգացման» նախաձեռնության անդամ Հայարփի Բաղդասարյանը։
«Այս պահին համալսարանի բակում ուսանողներ հավաքված չեն, ամեն ինչ տեղի է ունենում ԵՊՀ ֆիզիկայի ֆակուլտետում։ Այստեղ նախորդ անգամվա պես տղաներից երկուսը հացադուլ են հայտարարել»,- ասաց Հայարփին։
Բողոքի նոր ակցիայի մասին ուսանողները տեղեկացել են նախաձեռնության ֆեյսբուքյան էջում տեղադրված հայտարարությունից, որում նախաձեռնության անդամները հայտնել էին, որ պատասխանատու գերատեսչությունների հետ հանդիպում-քննարկումների ընթացքում նախաձեռնությանը ներկայացրած առաջարկներով հնարավոր չի եղել հասնել առարկայական լուծումների։
«Պաշտպանության նախարարությունը, հավատարիմ մնալով իր դիրքորոշմանը, չի ընդունում գիտության ոլորտի վրա օրենքի ունեցած ծանր ազդեցության շուրջ մտահոգությունները և տարկետման իրավունքի կարևորությունը գիտության ճանապարհն ընտրած երիտասարդների համար, ռազմարդյունաբերական համալիրի շրջանակում պատրաստ է օգտագործելու միայն բնագիտական ոլորտի ուսանողների հմտությունները՝ հումանիտար գիտությունների դեպքում անտեսելով կրթության շարունակականության խնդիրը»,- ասված է հայտարարության մեջ։
«Հանուն գիտության զարգացման» նախաձեռնությունն իր հայտարարության մեջ ավարտված է համարել իշխանությունների հետ քննարկումները և նշել, որ «պայքարը շարունակելու է այն կետից, որտեղ դադար էր առել»։
Ուսանողական նոր դասադուլի ու հացադուլի մասին մեր զրուցակից ուսանողներից ոչ բոլորն էին տեղյակ։ Ֆիզիկայի ֆակուլտետից բացի, ԵՊՀ մյուս ֆակուլտետների մասնաշենքերում մեր հարցախույզի պահին բնականոն դասապրոցես էր։
Նշենք, որ ՀՀ կառավարության ներկայացրած «Զինվորական ծառայության և զինծառայողի կարգավիճակի մասին օրենքի» նախագծով նախատեսվում է վերացնել ՀՀ պետական բուհերի պետպատվերով սովորող ուսանողների համար գործող օրենքով նախատեսված տարկետման իրավունքը։ Կառավարության հիմնավորմամբ` այդ քայլը միտված է վերացնելու հնարավոր կոռուպցիոն ռիսկերը։
ԱԺ-ի կողմից ընդունվելուց հետո, նոյեմբերի 29-ին ՀՀ նախագահ Սերժ Սարգսյանը ստորագրեց օրենքում փոփոխություններ և լրացումներ կատարելու մասին ՀՀ օրենքները:
