ԵՐԵՎԱՆ, 15 մարտի — Sputnik, Լաուրա Սարգսյան. Վրաստանի իշխանությունները խոստացել են հաշվի առնել Հայաստանի մշակույթի նախարարության կարծիքը Թբիլիսիի Պետրոս Ադամյանի անվան պետական դրամատիկական թատրոնի նոր շենքի շինարարության ժամանակ։ Այդ մասին Sputnik Արմենիայի թղթակցի հետ զրույցում ասաց Հայաստանի մշակույթի նախարար Արմեն Ամիրյանը։
Ամիրյանն օրերս Վրաստանի մշակույթի և սպորտի նախարար Միխայիլ Գիորգաձեի հետ այցելել է Թբիլիսիի հայկական թատրոնի շենք և տեսել, թե այն ինչ վիճակում է։
«Իմ վրացի գործընկերը հավաստիացրեց, որ նոր հայկական թատրոնը լավագույնը կլինի Վրաստանում։ Համենայն դեպս, ես համոզվել եմ, որ շենքը քանդելու մասին նրանց որոշումը ճիշտ է», — ասաց Ամիրյանը։
Հայ նախարարը Գիորգաձեին խնդրել է տրամադրել իրենց փորձաքննության որոշումը։ Նա նաև հերքեց շրջանառվող լուրերն այն մասին, որ շենքը քանդելուց հետո նորը չի կառուցվի։
«Եթե կառավարությունը պաշտոնապես խոստանում է, ապա դա կարվի… Թատրոնը գտնվում է Վրաստանի տարածքում, իսկ Վրաստանի կառավարությունը` մասնավորապես երկրի վարչապետը և մշակույթի նախարարը խոստացել են ինձ և Կարեն Կարապետյանին, որ թատրոնը կկառուցվի», — ասաց Ամիրյանը։
Հայկական թատրոնի գեղարվեստական ղեկավար Արմեն Բայանդուրյանը ճիշտ է համարում թատրոնի շենքը քանդելու մասին որոշումը։ Շենքն այնքան է հնացել, որ չի դիմանա անգամ չորսբալանոց երկրաշարժին։
«Ավելի արագ կլինի նոր շենք կառուցել, քան վերականգնել հինը։ Վտանգ կա, որ անգամ շենքի վերականգնումից հետո ճեղքերը կրկին կհայտնվեն», — Sputnik Արմենիայի թղթակցի հետ զրույցում ասաց Բայանդուրյանը։
Նախատեսվում է շենքը կառուցել երկուսուկես տարում։ Արտաքուստ նոր թատրոնը շատ քիչ կտարբերվի հին շենքից, իսկ ներսից հագեցած կլինի ժամանակակից սարքավորումներով, օթյակներ, ամֆիթատրոն կունենա։ Այսօր թատերախումբը շարունակում է աշխատել, երկու օր առաջ այն հյուրախաղերով ժամանել էր Երևան։
Հայկական թատրոնը վերականգնելու աշխատանքները սկսվել են 2017թ.-ի օգոստոսին։ Ակնկալվում է, որ հայկական թատերախումբը նոր շենքում կկարողանա ներկայացումներ տալ 2019թ.-ի վերջին։
Հայկական թատրոնի շինարարական աշխատանքների ֆինանսավորումն ստանձնել է Վրաստանի նախկին նախարար Բիձինա Իվանիշվիլին։ Նա առաջին անգամ չէ, որ օգնում է Վրաստանի հայ համայնքին. Իվանիշվիլին աջակցել է նաև Թբիլիսիի Սուրբ Գևորգ հայկական եկեղեցու վերակառուցման հարցում։
