ԵՐԵՎԱՆ, 15 մարտի — Sputnik. Թուրքիայի իշխանությանը պաշտոնապես ծանուցվել է դիվանագիտական հարաբերությունների վերաբերյալ հայ-թուրքական արձանագրությունները չեղարկելու մասին։ Կառավարության նիստից հետո այսօր այս մասին լրագրողներին ասաց ՀՀ փոխարտգործնախարար Շավարշ Քոչարյանը։
Երբ նախագահ Սերժ Սարգսյանի հանձնարարականով արձանագրությունները չեղարկվել են, թուրքական կողմն այդ մասին տեղեկացվել է միջազգային իրավունքի պահանջների համաձայն։
«Կատարվել է նախագահի հանձնարարականն առ այն, որ թուրքական կողմը տեղեկացվել է այդ մասին, և դա բխում է միջազգային իրավունքից: Հիշեցնեմ, որ հայկական կողմը հայտարարել է, որ միշտ էլ պատրաստ է բանակցությունների, հարաբերությունները կարգավորելուն, բայց առանց նախապայմանների, այդ ուղղությամբ մենք որևէ առաջարկ չենք ստացել», — ասաց Քոչարյանը։
ԱԳՆ երկու երկրների ղեկավարները դիվանագիտական հարաբերություններ հաստատելու և երկկողմանի հարաբերությունների զարգացման վերաբերյալ արձանագրությունները ստորագրել էին 2009թ-ի հոկտեմբերի։ Մինչև այդ Հայաստանի նախագահ Սերժ Սարգսյանը և Թուրքիայի նախագահ Աբդուլլահ Գյուլը փոխադարձ այցեր էին կատարել` ներկա լինելով Հայաստան-Թուրքիա ֆուտբոլային հանդիպումներին։
«Ֆուտբոլային դիվանագիտությունը» ենթադրում էր առանց նախապայմանների հարաբերությունների հաստատում։ Այլ խոսքով` ենթադրվում էր, որ Հայաստանը Թուրքիայից չի պահանջի ճանաչել Հայոց ցեղասպանությունը, իսկ Թուրքիան զիջումներ չի պահանջի արցախյան հարցում։ Հայաստանը կատարել է իր պարտականությունները, Թուրքիան հրաժարվել է վավերացումից` հայտարարելով «հայկական ուժերը բռնազավթված տարածքներից դուրս բերելու» անհրաժեշտության մասին։
Հայաստանի իշխանությունները մի քանի տարի շարունակ չէին փակում բանակցությունների դռները։ Սակայն 2018 թվականի մարտի 1-ին Սերժ Սարգսյանը արձանագրությունները չեղարկելու վերաբերյալ հրամանագիր ստորագրեց։
Պաշտոնական Երևանի որոշման մասին ոչ միայն Թուրքիան է տեղեկացվել, այլև այն երկրները, որոնց ներկայացուցիչները Ցյուրիխում ներկա էին արձանագրությունների ստորագրմանը` Ռուսաստանը, ԱՄՆ-ն, Ֆրանսիան, Շվեյցարիան և ԵՄ-ն։
