ԵՐԵՎԱՆ, 15 մարտի — Sputnik. Որոշ դեղերի համար մարտի 1-ից պարտադիր պահանջվող դեղատոմսը բժիշկը դուրս է գրում միայն հիվանդի բժշկական քարտի համարի նշումով: Նոր կարգի այս դրույթը հանրության մոտ մտավախություն է առաջացրել, որ քարտի բացակայության դեպքում բժիշկը նոր քարտ է բացելու` պահանջելով դրա դիմաց` 5000 դրամ վճարել:
Քաղաքացիների այս մտավախությանը առողջապահության նախարարությունը պատասխանում է. «Ամբուլատոր-պոլիկլինիկական ծառայությունները Հայաստանի Հանրապետության քաղաքացիների համար անվճար են»: Ինչ վերաբերում է բժշկական քարտին, ապա դրա փոխարեն բժիշկը դեղատոմսի վրա կարող է նշել ցանկացած այլ բժշկական փաստաթղթի համար (hիվանդության պատմագիր, էպիկրիզ, բժշկական հանձնաժողովի (կոնսիլիումի) որոշում):
Բնակչության մտահոգությանը, թե դեղատները կարող են ստվերային պայմանավորվածություն ունենալ դեղարտադրող կամ ներկրող ընկերությունների հետ` տվյալ դեղը մեկ ուրիշի փոխարեն վաճառելու դիմաց «ատկատներ» ստանալու համար,ԱՆ–ը պատասխանում է` վկայակոչելով Վարչական իրավախախտումների մասին օրենքը, որի համաձայն նման դեպքերի համար նախատեսում է տուգանք` նվազագույն աշխատավարձի 50-70-ապատիկի չափով:
Հայաստանցիների գյուղաբնակ հատվածի այն մտայնությանը, թե գյուղերից շատերում հիվանդանոցներ չկան, լավագույն դեպքում` ամբուլատորիայում միայն մեկ բուժքույր է լինում, ով դեղատոմս գրելու իրավունք չունի, նախարարությունը փաստում է, որ ամբուլատորիաներում աշխատում են բժիշկներ, իսկ այն գյուղերը, որոնք չունեն ամբուլատորիաներ, կցված են մոտակա գյուղական բժշկական հաստատությանը։
Միաժամանակ, նախարարությունը չի հերքում, որ ամբուլատորիաները գիշերը փակ են։ Ուստի անհետաձգելի բուժօգնություն պահանջող դեպքերում, խորհուրդ է տալիս դիմել շտապօգնության ծառայությանը:
